Shilong, Nailur 20
Ka Hynñiewtrep Youths’ Council (HYC) ka pynpaw ïa ka jingsngewkhia bad pynrem jur ïa ka Sorkar Jylla haba ïadei ka jingmih khubor ba ki 27 ngut ki suba Bangladesh ki briew ba la shah bat ha Assam bad ba la kynnoh ba kitei ki briew ki wan rung sha India lyngba thaiñ Dawki ha Meghalaya.
“Lada kane ka khubor ka long kaba dei, ka pynmih ïa ki jingkylli kiba khraw shaphang ka jingïada ïa u pud u sam bad ka rukom treikam jong ki tnat kiba don bynta ban peit bad sumar ïa u pud u sam jong ka India-Bangladesh ha Meghalaya” ong ka kyrwoh khubor u Bah Roy Kupar Synrem kum President HYC.
Ka HYC ka la kynthah ruh ïa ka Sorkar Jylla da kaba ong ba ka Sorkar kam dei ban kheiñ ba kane ka mat ka la kut tang namar ba kine ki briew ki la shah kem ha Assam, hynrei ka jingkylli kaba kongsan ka long kumno ki lah ban rung lyngba u pud, kumno ki la leit lyngba Meghalaya khlem shah lap, bad la don ne em kino-kino ki briew ne ki kynhun kiba la ïarap ïa ki ha ka jingïaid jong ki.
Ka HYC ka dawa ïa ka jingtohkit kaba bniah ban tip ïa kaei kaba la jia naduh kaba sdang haduh ba kine ki briew ki poi ha Assam, ka la kyntu ïa ka Sorkar ban pynkhlaiñ noh mardor ïa ka jingpeitngor bad jingïada ha ki bynta jong u pud ka India-Bangladesh kiba dang duna ka jingpahara, kynthup ïa ki lynti ïaid kjat bad ki jaka ba ju ïaid paidbah.
Ka HYC ka pynshai ba kam don ka jingpyrshah ïa kino-kino ki jaidbynriew, hynrei ka jingdawa ka long ba ki nongshong shnong tynrai jong ka Meghalaya ki don ka hok ban dawa ba u pud jong ka ri un long u ba la ïada bha bad ba ka jingïarung be-aiñ na shabar Ri kan ym ktah ïa ka imlang sahlang, ka ïoh ka kot bad ka jinglong jingman ki paidbah jong ka Jylla.
