Jowai, Nailur 20
U Myntri ka tnad ka koit ka khiah Bah Wailadmiki Shylla ha ka 19 tarik Nailur u la leit ban jngoh bad jurip ïa ka Mihmyntdu Health and Wellness Centre, kaba ha Mihmyntdu West Jaiñtia Hills District.
Ha kane ka jingleit jurip, u Myntri u la pyntip ba ka kynhun kan sa wan ban leit jngoh ïa kane ka jaka sumar ha ki taiew ban wan, ban bishar bniah ïa kane ka jaka na ka bynta ban ïoh ïa ka NQAS (National Quality Assurance).
U la pyntip ba kane ka kynhun kan bishar bniah ïa ki jingshakri bad ki jingdonkam kiba don ha kane ka jaka sumar kum shi bynta jong ka jingpynskhem ne ithuh.
U Myntri u la ong ba palat 100 tylli ki jaka sumar ki la ïoh ïa ka syrnot jong ka NQAS ha kine ki khyndiat snem ba la dep. U la pynpaw ba ka jingïoh ïa ka jingithuh ka ïarap ban pynskhem ïa ka jingshaniah jong ki paidbah ha ki jingshakri ha ka koit ka khiah bad ka jingsumar ba la ai ha ki jaka sumar.
U la ban jur ruh ba ki jaka sumar ki donkam ban shah pynkiew kyrdan na ka por sha ka por khnang ban pynbiang ïa ki jingdonkam jong ki paidbah.
Nalorkata, u Myntri u la pyntip shuh shuh ba ka Sorkar Pdeng ka la pynshlur ban buh ïa ki AYUSH centre ban pynïar ïa ka jinglah ban ïoh ïa ka rukom sumar tynrai. U la pyntip ruh ba shen yn sa buh ïa ka jaka sumar AYUSH ha Mihmyntdu Health and Wellness Centre.
U la ong ba ka jaka sumar AYUSH ba la tyrwa, ryngkat bad ka jingpyrshang kaba dang ïaid shakhmat ban ïoh ïa ka jingithuh jong ka NQAS, la khmih lynti ba kan pynkhlaiñ shuh shuh ïa ki jingshakri ha ka koit ka khiah na ka bynta ki paidbah jong ka Mihmyntdu bad ki shnong ba marjan.
