Shillong, Nailur 20
U Myntri Khynnah ka External Affairs and Textiles jong ka Sorkar Pdeng u Pabitra Margherita u la ong ba ka Jylla Meghalaya ka dei kawei na ki Jylla ka thaiñ shatei lam-mihngi ka ri kaba don ïa ki jaka kiba itynnad tam ha ka pyrthei bad ki dei kaba la thaw kyrpang da u Blei.
Ïa kane u la Margherita u la pynpaw haba kren sha ki nongthoh khubor ha ka sngi Saitjaiñ hadien ba la wai ka Rozgar Mela kaba la long ha State Convention Centre Shillong.
Shuh-shuh u la ong, Kaei kaba ngim don ha ka Jylla Meghalaya, ngi don ki jingthung jingtep, ki mrad ki mreng, ki lum ki wah, ka jingitynnad, ka jingjyrngam, ki briew jong ka, ki riti dustur, ka kolshor, ki jaiñ bad ki dang don bun bha kiwei-kiwei kiba khring ïa ki briew ba na kylleng ka pyrthei ban wan jngoh.
Nalor kata u la ong ba ki nongjngohkai ba na kylleng ka pyrthei ki ïoh bun jait kiei-kiei ba kin tip bad ïohi ha kane ka Jylla. Kumta u la pynpaw ba ka Sorkar India ka ju kyrshan ïa la ki briew ha ka liang ka roi ka par, bun ki sienjam ba ka Sorkar India ka la leh, ka dei na ka bynta ban nang kyntiew shuh-shuh ïa ka kam jngohkai pyrthei hapoh ka Jylla Meghalaya bad ha ka thaiñ shatei lam-mihngi ka Ri.
U la pynpaw ba u don ka jingkyrmen kaba skhem ba ki nongwan jngohkai ba na kylleng ka pyrthei kin nangwan jngoh shuh-shuh ïa ka ïa ka Meghalaya ha ki snem ban sa wan.
