Shillong, Nailur 20
Lai ngut ki briew kiba la suba ba ki dei ki nong Bangladesh ki la shah bat ha ka Jaiñtia Students’ Union (JSU) Jowai Circle ha Lad Demthring ha ka Sngi U Blei.
Kine ki lai ngut ki la shah bat katba ki dang shong ha kawei ka kali ‘Tourist’ kaba rong lieh kaba don ïa u nomber ML-04-E-3485 kaba la rejistar ha ka kyrteng jong u Bah Treibor Kyndait na Shkenpyrsit.
Ka JSU ka la kam ba ha ka por ba pynshisha ïa ki kot ki sla, kitei ki 3 ngut ki la phla ba ki dei ki trai-ri Bangladesh.
Hadien la rah noh ïa ki sha Jowai Police Station bad la aiti sha ki pulit. Ha kajuh ka por, la ujor ejahar haba ïadei bad kane ka bynta.
Ha kawei pat ka liang, ka JSU ka la kynnoh ba ki ‘Broker’ kiba don bynta ha ki kam be-aiñ ki la pyrshang la ki lad ki lynti, da kaba tyrwa bad thong da ki lak tyngka ban pyllait noh ïa kitei kiba briew kiba shah bat.
“La tyrwa sha ngi ïa ka pisa kaba kot da ki lak tyngka ban pyntikna ïa ka jingpyllait ïa kitei ki briew. Ngi la kyntait ïa kane ka bad ngi la ïaid shakhmat bad ka ejahar,” la ong u Education Secretary ka JSU, u Bah Bocheru Mi Pohsnem.
“Ka JSU ka ïeng skhem bad kan ym ailad ïa ki nongleh kam sniew haba ïadei bad ka jingwan rung be-aiñ ba kin lait na ka jingpynshitom. Ngi dawa ïa ka jingtohkit kaba bniah bad kaba kyrkieh da ki pulit ban pyntikna ba kane ka jingïadei na shiliang-sha-shiliang khappud kan shah pynduhjait shisyndon,” u la ong.
