Jowai, Nailur 20
Haba kynthoh halor ka jingthmu kyntiap seng noh jong ki phra ngut ki MLA ka UDP sha ka BJP, u Bah Vivan G Kynta u la kyntu ïa ki MLA ba kin long kiba phikir ïoh kin shu mong ei ka lbong na ka jingtar ki sainar shiah.
U Bah VG Kynta uba long ruh u kyrtong jong ka UDP na ka bynta ka ilekshon MP shiteng samoi (by-election) na ka Shillong Lok Sabha Parliamentary seat, u la kren ïa kitei ki kyntien ha ka jingïalang jong ka UDP Jowai Legislative Assembly Circle ha Tpepale, ha ka 19 tarik Nailur.
U Bah Kynta u la ong shuh shuh ba u Myntri ka tnad Kam Pohïing u Amit Shah um don bor da lei lei ruh ba un shu ai ha ka pliang ïa ka ktien Khasi ban thep hapoh ka Khyrnit kaba Phra jong ka riti synshar ka ri.
“Ka don ka jingkular lamler ïa ki 8 ngut ki MLA jong ka UDP kaba ong ba lada phi wan ïasoh bad ngi, ngin ai ïa phi ka ktien Khasi. Kane ka dei tang ka jingpynthame jong u Amit Shah,” la ong u Bah Vivant G Kynta.
U la ong ruh ban pynrung ïa kano kano ka ktien hapoh ka Khyrnit kaba Phra, donkam ban don ka jingbun paidbah kaba 3 pawa hapoh Parliament ki ban ai jingkyrshan, ym ka kam shimet.
Halor ka FCRA, u Bah Kynta u la ong kam myntoi ka jingtyrwa jong u Amit Shah, namar ki Rangbah Balang na baroh kawei ka ri India kiba leit sha ka Sorkar Pdeng ban wanrah ka jingpynkylla, bad namar ka jingkhlain ka jingdawa jong ki, la pynsangeh ban pass ïa ka Bill bad la ailad ïa ka Parliamentary Panel ban eksamin, bad ba la pynjynsur ruh ïa ka jingpyrkhing ïa kane ka ain.
Watla ka don ka jingkhih phaloh ha ka jingmut jingpyrkhat jong ki paidbah na ka jingthmu ryngkang diengkper ki MLA, hynrei ka UDP kan ïaineh ïaisah junom la junom kum ka seng riewlum, u la ong.
Ha ka jingïalang u Bah Kynta u la pynpaw ruh ïa ka thong ba hakhmat tam, ha kane ka ilekshon shiteng samoi kata ba un dawa tyngeh hakhmat ka Sorkar Pdeng ban pyntreikam ïa ka Inner Line Permit (ILP) hapoh ka Jylla, namar ka dei ka ain kaba khanglad ïa ki nongbylla bar jylla, bad ki poiwir ban wan shapoh ka jylla kaba dap ka dud bad ka ngap, bad bynrap ba ha u snem 2019 dang lah ban pyntreikam ïa ka ILP hapoh Jylla Manipur kan don jingeh aiu ban pyntreikam hapoh ka Meghalaya.
U la kyntu ruh ïa ki paidbah ban ailad ïa u kyrtong jong ka UDP ha kane ka ilekshon shiteng samoi khnang ban ïohlad ban pyndep ïa ka kamram hapoh parliament.
