Shillong, Nailur 21
Ka Khasi Hills Autonomous District Council, kan sa rakhe ïa ka lyngkhuh dap 75 snem jong ka naduh ba la sdang ïa ka, kane ka jinglehkmen kan long baroh shi snem kynthih bad kan sdang ha ka 30 tarik u Risaw 2026, bad pynkut ïa ka ha u Risaw 30 tarik 2027.
Na ka liang u CEM ka KHADC u Bah Winston Tony Lyngdoh, uba dei ruh u Chairman jong ka Komiti u la ong ba kane ka jinglehkmen kan kynthup ïa ki prokram kiba ïadei bad ka kolshor, ki jingai jinghikai, ki jingbuh jingthoh kiba kyrpang bad ruh ki jingwad bniah bad ka jingpynmih ïa ka souvenir, kaba tih bniah ïa ka jingïaid lynti jong ka Council ha kine ki 75 snem.
U la ïathuh ruh ba ka council ka la thaw ïa ki komiti ki bapher-bapher, kum ka komiti kaba peit ïa ka Mang pisa, ka Media, kolshor, ka komiti ban pynbiang ïa ki jingdonkam, ban buh jingthoh bad kiwei pat kiba ïadei bad kane ka jinglehkmen.
Ka jingplie ïa kane ka jingrakhe kan long ha ka 30 tarik u Risaw 2026 ha KHADC bad ha kane ka jingplie ïa kane ka jinglehkmen, ka council kan ym khot kongsan ïano-ïano ruh.
Shuh shuh u Bah Winston Tony Lyngdoh u la ong ba ki dang ïakren sani bha khamtam haba ïadei ban mang pisa bad ïoh ïa ki jingïarap, la ka dei na ka Sorkar Pdeng ne ka Sorkar Jylla lane lyngba ki CSR.
