Shillong, Nailur 21
U Myntri ka tnad ‘Soil and Water Conservation’, u Marcuise N. Marak ha ka Lah Sngi U Blei u la ong ba ka um na ka bynta ka Meghalaya kam dei tang ka jingdon-jingem, hynrei ka don ka jingïadei kaba ïajan bad ka mariang, ka rep ka riang, ki lad kamai bad ka bha ka miat jong ki shnong ki thaw.
U Marak u la kren ha ka jingïalang ‘workshop’ kaba ar sngi jong ka ‘PMKSY-WDC 2.0’ halor ka phang, “Experience Sharing, Learning and Way Forward” kaba la sdang ha State Conven-tion Centre, Shillong.
U la ong ba ka nongrim kaba lam lynti jong ka ïoh ka kot bad ka mei-mariang hapoh ka ‘PMKSY-WDC 2.0’ ka long kaba ïadei khamtam eh na ka bynta ka Meghalaya, bad ka Sorkar hapoh u Myntri Rangbah ka Jylla, u Conrad K. Sangma ka la pynïahap ïa ka roi ka par ha ka ïoh ka kot bad ka jingpynneh-pynsah ïa ka mariang bad ka jingïa-shim bynta jong ki paidbah.
“Ka jingthmu ba kongsan jong ka ‘Watershed Development’ kam dei tang ban pyndep ïa ki projek ne ban thaw ïa ki jingdon-jingem ba lah ban ïohi hynrei ban pyntikna ba ka jingpynneh-pynsah ïa ka um kan kylla sha ki lad kamai kiba kham bha, ban pynbha ïa ka jingmih ha ka rep ka riang, ban thaw ïa ki lad ki lynti na ka bynta ki longïing bym don jaka, ban pynkhlaiñ ïa ki SHG bad ki FPO bad ban pyntikna ba kine ki jingmyntoi ki poi sha ki paidbah kiba shaniah ha kine ki jingdon-jingem,” ong u Marak.
U Myntri u la ong ba ka teknoloji ka la pynkhlaiñ ïa ka rukom treikam jong ka Jylla. Ka Meghalaya ka la pynithuh palat 70,000 tylli ki ‘Spring-Shed’, la buh ‘Map’ ïa palat 65,000 tylli ki tyllong um bad ban buh hakhmat eh ïa 792 tylli ki tyllong um kiba kongsan na ka bynta ban pynkhie im biang.
U Marak u la kdew ruh ba ïa ka Meghalaya ka la ithuh kum ka Jylla kaba la treikam bha hapoh ka ‘PMKSY-WDC 2.0’ kaba la ïoh ïa ka ‘score’ kaba 73.47% na ka bynta u snem 2026-27 na ka Sorkar India.
Kane ka jingïalang kaba la pynlong da ka tnad Soil & Water Conservation bad Meghalaya State Watershed & Wasteland Development Agency (MSWWDA) ka la sakhi ïa ka jingplie paidbah ïa ka ‘website’ ba la pynthymmai jong ka tnad bad ïa ka Project Management Information System (PMIS) hapoh ka Climate Adaptive Community Based Water Harvesting Project (CACbWHP).
Ka PMIS ka lum lang ïa ki jingtip jong ka projek, pynïasoh ïa ki ‘Unit’ jong ka Jylla bad ki distrik bad ka kynthup ïa 533 tylli ki jingtei jaka pynlang um ha kylleng ki 12 tylli ki Block BMP, kaba pynlah ban buddien ha ka por ba shisha bad ban shim ïa ka rai ba la pynshong nongrim ha ki sakhi.
La pyllait ruh ïa ka kaiphod ba man u snem jong ka tnad bad ka jinglum thup ïa ki khana jingjop haba ïadei bad ka ‘Watershed’.
Ha kajuh ka por la pynkup burom ïa ki nongjop ha ka ‘Watershed Janbhagidari Cup 2026’ (Phase II) bad ‘Social Media Competition’ hapoh ka ‘PMKSY-WDC 2.0’.
Ha ka jingkren maitphang, u Director ka tnad Soil & Water Conservation bad Deputy CEO, MSWWDA, Bah L. Shabong u la ong ba ka jingpyntreikam ïa ka ‘PMKSY-WDC 2.0’ ka la urlong lyngba ka jingïatreilang.
U la ong ba ka Meghalaya ka don haduh 2,776 tylli ki ‘Micro-Watershed’ kiba la buh kyrdan hapoh ki thup kyrdan bapher-bapher. Ka ‘PMKSY-WDC 2.0’, kaba la sdang ha u snem 2021-22, ka kynthup ïa 32 tylli ki projek ha kylleng ki 62,000 hektar bad ki 96 tylli ki ‘Micro-Watershed’ ha ryngkat ka jingbei tyngka kaba T.175 klur ha kylleng ki distrik.
Ki sien-shong ha kane ka sngi ki kynthup ïa ki jingkren na ka kynhun SLNA, NESAC bad NEDFi halor ka ‘Technical Planning’, ‘Spatial Application’ bad ka jingkyrshan ïa ki shlem bad ki jingïakren halor ki jingpule na ka ‘WDC 1.0’ bad ‘WDC 2.0’ katba dang pynkhreh na ka bynta ka ‘WDC 3.0’.
Kane ka ‘workshop’ kan bteng haduh ka 22 tarik u Nailur ryngkat ki ‘Technical Session’ halor ki jingshem ha ki thaiñ, kata na Ri-lum Khasi-Jaiñtia bad Garo bad ki jingpynpaw na ka ICAR, NEHU Tura bad ka SIRD nalor kiwei.
