Shillong, Nailur 21
U Myntri ka tnad Food and Civil Supplies ka Sorkar Meghalaya u Bah Methodius Dkhar ha ka sngi Nyngkong u la pyntip ba ka tnad ka la pynlong ïa ka jingïalang bishar kam bad ki Wholesaler jong ka West Khasi Hills, Eastern West Khasi Hills bad South West Khasi Hills District halor ka jingpynpoi ïa ki marbam sha kine ki Distrik.
“Ha kine ki bnai ba la dep, ki la don ki jingeh kiba ïadei bad ka kudam FCI ha Pyndengrei, Nongstoiñ, kaba pynpoi ïa ki marbam sha ki Wholesaler jong kine ki lai District,” la ong Bah Methodius.
U la ong ba namar kane ka jingeh, la bthah shipor ïa ki Wholesaler ban shim ïa ki marbam na Shillong bad Sohryng -kham. Hynrei, u Wholesaler jong ka West Khasi Hills u la pynpaw ïa ka jingsngewkhia halor ka jinglut bad ka jingjngai jong ka lynti.
“Hadien ka jingïakren kaba bniah, ngi la pynsngewthuh bad ngi la kyrpad ïa ki ban shim ïa ki marbam na Shillong na bynta ka bhah jong u Nailur, haduh ban da don kawei pat ka jingpynbeit,” u la ong.
U Myntri u la ong ba ki Wholesaler ki lah ruh ban shim ïa ki marbam na Sohryngkham lane Williamnagar, lada kine ki jaka ki khamjan bad kham biang ïa ki. “Ki paidbah ha kine ki jaka ki la don ka jingkhuslai namar la kumba shi bnai kim shym la ïoh ïa ki marbam. Mynta, ki wholesaler ki la mynjur ba kin shim ïa ka bhah kaba sah jong u Nailur ha kane ka taïew,” u la ong.
Haba pynshai ïa ka daw jong ka jingbym poi ki marbam sha ka FCI depot ha Pyndengrei, u Bah Methodius u la ong ba ka jingeh ka ïadei bad ka jinglong jong ka surok kaba pynïasoh na ka surokbah sha ka depot. “Ka don ka jingsngewkhia na u Rangbah Shnong bad ka Village Committee ba lada ki trok kiba heh ki ïaid lyngba kane ka surok, ki lah ban pynjulor ïa ka” u la ong.
“Watla ka don ka jingpyrshang na ka liang jong ngi ka tnat bad ka PWD ban pynthikna ba ka surok kan neh, hynrei ka la don ka jingsngewkhia bad ka jingïasngewthuh bakla halor kane ka bynta. Kane ka dei ka daw kaba pynlong ïa ka jingpynsangeh ïa ka jingleit jong ki trok sha ka FCI depot ha Nongstoiñ” u la bynrap.
