Shillong, Nailur 21
Ka Khasi Students’ Union (KSU) Central Executive Council ka la phah ‘Legal Notice’ sha ki arngut ki heh pulit haba ïadei ka jingkynnoh kaba mih na ka jingtalasi kali bad arshaka ki pulit ha ka miet 18 tarik u Nailur 2026 hajan ka Samkhamti Petrol Pump, Urkaliar.
Ka jingphah ‘Legal Notice’ ka KSU ka kdew ïa u Bah Dangsan Khyriem, MPS, Superintendent of Police (Shillong City) bad u Hari Prasant M.R., IPS, Superintendent of Police (Traffic), East Khasi Hills District ïa kaba la phah lyngba u Advocate ka KSU, ha ka kyrteng jong ka KSU Central Executive Council, ong ka kyrwoh khubor u samla Pynshai Kupar M Dkhar u ba long kum u Information & Publicity Secretary ka KSU CEC.
Katkum ki kyrwoh khubor ba na ki pulit la kdew ba ha ka miet jong ka 18 tarik u Nailur 2026 katba ki pulit ki dang pynlong ïa ka jingtalasi ki kali bad arshaka ne ‘Naka’ ban peitngor ïa ka suk ka saiñ ha nongbah Shillong, arngut ki briew kiba shong ha ka Scooty ki la pyrshang ban phet ban lait na ka jingtalasi ki pulit, ha kaba ki la leit ban tynrah ïa u Additional SP (Traffic) ba la pynlong ïa utei u heh pulit ban mynsaw jur, ki pulit ki la ïoh ban kem ïa kitei ki arngut bad ki la kurup ïa ka Scooty.
Ka KSU ka pynpaw ïa ka jingsngewkhia kaba jur halor ki jingkynthoh bad jingkynnoh kiba la mih ha ki lad pathai khubor ba la kdew ba kitei ki arngut kiba shah kem la pynïadei ne pynsuba ba ki long ki dkhot jong ka KSU.
Ka KSU ka pynpaw shai ba ym don kino-kino ki sakhi sabut kiba shai, kiba lah ban pdiang ha ka aiñ bad kiba pynshisha ba kitei ki arngut ki long ki dkhot ne kiba don jingïadei bad ka KSU. Ka ‘Legal Notice’ ka dawa ïa ki bor ba dei khmih ba kin pynshai halor ka nongrim bad ka jingpynshisha kaba ki la pyndonkam ban pynïadei ïa kitei ki briew bad ka KSU hakhmat ki paidbah lyngba ki lad pathai khubor.
Shuh-shuh ka KSU ka pynshai ruh ba kane kam dei satia ka jingpyrshang ban khanglad ïa ka jingtohkit jong ki pulit ne ban ktah ïa ka jingbishar halor ka jingjia ba 18 tarik u Nailur, hynrei ka nongrim jong ka KSU ka long ba ka jingkitkhlieh jong kano-kano ka kam runar ka dei ban shong halor ki sakhi bad ka rukom treikam kaba katkum ka aiñ bad ym dei ban pynïadei ïa ka seng bad kano-kano ka kam runar tang halor ka jingsuba ne ki jingtip kiba khlem pat lah ban pynshisha.
Ka KSU ka pynpaw ruh ba ka jingpynïadei ïa kitei ki briew bad ka KSU khlem ka jingpynshisha kaba biang ka lah ban pynsniew ïa ka nam, ka burom bad ka jingshaniah ki paidbah ïa ka KSU bad ïa ki dkhot jong ka.
Kumta lyngba kane ka ‘Legal Notice’, ka KSU ka ai por hapoh 15 sngi naduh ka sngi ba ki la pdiang ïa ka jingpyntip ba kine ki arngut ki heh pulit ki dei ban panmap bad pynshai paidbah lyngba ka jingthoh kumjuh lyngba ki lad pathai khubor bad sha ka KSU, kumjuh ban sangeh pynmih kino-kino ki jingkynthoh ba bakla kiba khlem lah ban pynshisha lane kiba pynsniew ïa ka burom jong ka KSU.
Ka KSU ka pynbna ruh ba lada kine ki arngut kim pyndep ïa kine ki jingdawa hapoh ka por ba la buh, ka KSU kan hap ban shim ïa ki sienjam kiba biang ha khmat ka aiñ, kynthup ïa ka Criminal Proceedings katkum ka aiñ, halor ki jingkynnoh, ki jingkynthoh ki long kiba pynsniew ïa ka nam ka KSU baroh kawei.
Ka seng ka pynpaw ruh ba ka burom ïa ka jingtohkit bad ïa ka jingtreikam jong ka Ïingbishar halor ka jingjia ha ka 18 tarik u Nailur 2026, hynrei ka jingpyndonkam ïa ka aiñ ka dei ban long kaba ïaryngkat ïa baroh bad ki jingkynthoh paidbah na ki bor pulit na ka Sorkar bad kiba dei peit ki dei ban shong halor ki jingshisha kiba la pynshisha bad ki sakhi kiba biang, kumta ka KSU ka dawa ïa ki bor pulit bad ka Sorkar kiba don bynta ba kin ai jubab bad pyndep ïa ki jingdawa hapoh ka por ba la kdew ha ka ‘Legal Notice’.
