Shillong, Nailur 21
Ha ka jingbuddien halor ka ejahar kaba la ujor pyrshah ïa uwei u briew uba la ithuh kyrteng, u Bah Niwanhi Dkhar, uba la pyndonkam da ka kyrteng ka HITO nalor kiwei pat ki seng ban dawa pisa na ki briew, ka Hynñiewtrep Integrated Territorial Organisation (HITO) ha ka 21 tarik u Nailur, 2026, ka la leit ban kynduh ïa u Bah Vivek Syiem, SP East Khasi Hills District, ban ïakren halor kane ka kam.
Ha ka jingleit ka HITO sha ka ophis treikam u SP, la ïoh jingtip ba na ka liang ki pulit ki la kem noh ïa utei u briew uba donkti ha kane ka kam.
Haba kren sha ki lad pathai khubor, u Bah Donbok Dkhar, President, u la ong ba une u briew udei uba la mlien bunsien ban dawa pisa na ki briew nalor ka pyntieng pynsmiej ha kiba bun rukom, da kaba pyndonkam da ka kyrteng ka seng. U la ong ruh ba ki la don bun ki briew kiba la ngop ha une u briew bad u dei uba don bynta ruh bad ki seng saiñ pyrthei.
Nalorkata, u la ong ruh ba ki paidbah kim dei ban tieng bad kiba la ngop ha une u briew kidei ban mih shakhmat bad ban bynrap, ba lada don mano-mano kiba pyndonkam da ka kyrteng ka seng ban dawa pisa, kidei ban kynduh lane phone ïa ki nongïalam.
“Nyngkong ngi la ap shrip ïa une u briew ba u dawa pisa ha ka kyrteng ka seng, hynrei um shym la wan ha ïew, bad ka seng ka la lap biang, ba une u briew u pan pisa da uwei u bar jylla ha ka kyrteng ka HITO, da kaba dawa pisa, hynrei ngi la bthah ba um dei ban phah ka pisa sha une u briew,” la ong u Bah Donbok.
Namarkata, u Bah Donbok u la kyntu ïa ki paidbah ba kin sngewbha ban ai jingtip sha ka seng lada jia ba lap ïa kum kine ki briew ba dawa pisa ha ka kyrteng ka HITO, bad ban wan ai ka jingujor ha ryngkat ki sakhi kiba biang, khnang ba ka aiñ kan leh ïa kaba donkam.
