Shilong, Nailur 21
Ka Hynñiewtrep Integrated Territorial Organization (HITO), Ri-Bhoi District, ki la ïoh pdiang ïa ka jingujor na ki arngut ki samla kynthei kiba trei bylla ha RR Assam Hotel, kaba don ha surok bypass, Bhoirymbong, Khapmara, halor ka jingkynnoh ba uwei u bar jylla, uba dei trai ïa katei ka jaka, u la leh kynshleiñ bad pyndik ïa ki.
Hadien ba la ïoh ïa katei ka jingujor, na ka liang ka HITO ka la leit sha katei ka jaka ryngkat bad kitei ki ar ngut ki samla kynthei, ban ïarap bad synran ïa ki. Ha katei ka sngi, la sei ïa utei u briew na katei ka jaka bad aiti noh ïa u ha kti ki pulit, khnang ba kin leh ïa kaba donkam katkum ka aiñ.
Ka HITO ka la synran ruh ïa kitei ki arngut ki samla kynthei sha thanad ban ujor FIR pyrshah ïa utei u briew. Na ka liang ki pulit ruh ki la shimkhia ïa kane ka kam bad leh ïa kaba donkam.
La ïohi ruh ba katkum ka durkhih ba la ïoh ring da ki kynthei ba ju shah leh kynshleiñ, la paw ba u tei u bar jylla, u la wan rung ha jaka thiah kawei ka kynthei ban thmu leh kynshleiñ. Kine ki samla kynthei ki la ïoh ringdur lyngba ka jingpynap shrip lypa, khnang ban lap ïa ki sakhi satar, ba une u bar jylla u ju leh kynshleiñ ïa ki.
Ka HITO Ri-Bhoi District ka pynpaw ba kan ïai ïeng ryngkat bad ki lanot kiba shah thombor bad ban ïarap ïa ki ban ïoh ïa ka hok katkum ka aiñ.
Ka HITO ka la kyntu ïa baroh ki nongtrei kynthei ba kim dei ban tieng ban ujor haba ki mad ïa kano-kano ka jingshah pyndik, bad ki khot ruh ïa ki bor pynïaid aiñ ba kin shimkhia ïa kum kine ki jingujor. Da kaba pynkut da kaba ong “Ka HITO kan ïai ïeng na ka bynta ka hok, ka jingshngaiñ bad ka burom jong ki kynthei.”
