Shillong, Nailur 21
Haba kdew ba kan buh jingeh na ka bynta ka roi ka par hadien-habud, ka Garo Students’ Union (GSU), Siju Regional Unit, Southern Zone, ka la kyntu ïa ka Sorkar ban weng noh ïa ka jingthmu ban pynduna ïa ka ‘Right of Way’ (RoW) sha ka 18 mitar ha ki jaka ba la tei na ka bynta ka projek surok Darugre sha Dalu.
Ha ka dorkhast sha u Deputy Commissioner, South Garo Hills ha ka Lah Sngi U Blei, u President ka seng, u Raiseng Marak u la ong ba ka projek ban pynkylla ïa ka surok ‘Single-Lane’ bad ka lynter ‘Intermediate-Lane’ kiba la don lypa na Darugre-Dalu sha ka surok ‘2-Lane’ ha ryngkat ki bynta ba sharud jong ka surok, ka dei ka sienjam kaba la ap la slem bah, hynrei ban pynduna pat ïa ka ‘RoW’ ka pyntroiñ noh ïa kane ka bynta.
Kane ka jingpyrshah ka long hadien jong ka kyrwoh khubor na ka ophis u DC ha ka 4 tarik u Nailur, 2026, kaba tyrwa ïa 18 mitar ka ‘RoW’ ha ki jaka ba shong ba sah briew ha ka jaka jong ka 24 mitar kaba la tyrwa.
Ka GSU ka la jer lai tylli ki nongrim ban pynneh ïa ka 24 mitar ha baroh ki bynta, kynthup ïa ki jaka sor bad ki shnong ki thaw. Halor ki jingdonkam ïa ki jingtei, ka la ong ba ka surok kaba 24 mitar ka long kaba donkam ban buh ïa ki nala um, ki lynti ïaid kjat, ki laiñ bording bad ki ‘pipe’ um nalor kiwei.
Halor ka jingbeit-jingryntih ha ka jingpynwandur, ka la kynthoh ba ka jingpynkylla ïa ka ‘RoW’ kan thaw ïa ka surok kaba rit bad kan pynbor ïa ki jingpynbeit ha ka rukom shna surok bad ki kyndon jingshngaiñ. Halor ka jingkiew ha ka lawei, ka seng ka la ong ba ki jaka sor bad ki shnong ki thaw kiba don harud surokbah ki la nang ïar bad ka jingpynduna ïa ka ‘RoW’ mynta kan mut ka jingshim ha ka dor kaba rem, bad kaba pynthut pat hadien.
“Na ka liang ki paidbah bad ki samla pule, ngi kyrpad ïa ka PWD, ka MoRTH bad ka NHIDCL ban pyrkhat biang bad pyntikna ba ka DPR ba la pynkylla kan ai ïa ka ‘RoW’ kaba 24 mitar na ka bynta ka lynter baroh kawei,” ong u Marak ha ka shithi.
