Shillong, Nailur 21
U Myntri ka tnad Labour u Bah Methodius Dkhar ha ka lah sngi U Blei u la ong ba ki kyndon kiba la pynbeit thymmai ban tehlakam ïa ka jingwanrung bad jingaikam ïa ki nongbylla ba nabar ki la treikam mynta, ha kaba ki kontraktor ki bym lah ban pynrung kyrteng ïa ki nongtrei bylla jong ki kin shah ngat ha ka kuna kaba heh bad ka jingshah set patok.
Haba kren sha ki nongthoh khubor u Bah Methodius u la ïathuh ba ka Sorkar Jylla mynha ka 9 tarik u Nailur ka la plie paidbah ïa ka website bad ka MIRSS portal na ka bynta ban pynrung kyrteng ïa ki nongtrei bylla ba nabar.
“Kane ka portal mynta ka la treikam bad la pyntip ruh ïa ki kyndon ba la pynkylla. Ka aiñ ka la treikam mynta. Ka rukom treikam kan kham suk, hynrei ki kyndon kin kham pyrkhing ban buddien ïa ki nongtrei bylla bad ban pynthikna ba ki kontraktor kin kohnguh ïa ki kyndon haba ïadei ka jingwan rung ki nongtrei bylla ba nabar” la ong u Bah Methodius.
Shuh-shuh u la ong, kiba pynkheiñ ïa ki kyndon aiñ kin shah pynshitom katkum ki kyndon ha kaba ha ka sien kaba nyngkong kin hap ban siew ïa ka kuna kaba long T.10,000, ha ka sien kaba ar T.25,000 bad lada lap ha ka sien kaba lai kin hap ban siew ïa ka kuna kaba kot sha ka T. 1 lak ha ryngkat ka jingshah shet along ba 3 bnai.
“Ka kuna kan dei ïa u Kontraktor, ym ïa u nongbylla. Namar lada u nongtrei bylla u wan hi ruh, u don hi u ba aikam ïa u. Ngim leit peit ha ki surok, ngi peit ha ki jaka trei jong ki. Lada ngi lap ba ki nongtrei bylla ba nabar ki trei ha kano-kano ka jaka khlem ka jingpynrung kyrteng, u kontraktor un ngat ha ka jingpynshitom” u la ong.
