Babu Kular Khongjirem
Ha kine ki taïew ba la dep, ka kam (issues) ban pynjah noh ïa ki kyrdan jong ka jingsiew tulop ha ki skul deficit (existing deficit system) bad ki skul Sorkar (govt. schools) ka la sdang khihwin hi puk hadien ba ka tnad Education ka Sorkar Meghalaya ka la pynmih ki jingpynbna paidbah (official notifications) kaba kren shai ba ki nonghikai kiban sa hikai ha ki skul deficit bad skul Sorkar nangne shakhmat ter ter yn siew noh da ka Structure Pay Framework (SPF) kumba siew lem ïa ki Nonghikai kiba hikai ha ki skul Adhoc bad SSA.
Ka la mih ruh bun ki kynhun nonghikai bapher bapher ki bym ïahap bad sngew pyrshah ïa katei ka rukom siew tulop thymmai ha ki kyrdan deficit bad skul Sorkar. Ha ka jingshisha, ki nonghikai ha ki skul Deficit bad skul Sorkar ki dei ki kam kiba hap ha ki sanctioned post ne permanent post ne regular post. Katkum ki State Pay Commission bapher bapher ba la thaw (constituted) da ka Sorkar Meghalaya, kine ki post la thoh shai ba ki dei ban ïoh (enjoyed) ka tulop (salary) bad kiwei kiwei ki jingmyntoi (allowance benefits) kiba ïa ryngkat lang hi kumjuh kumba ïoh ne siew ïa ki nongtrei sorkar (Govt. employees). Ki nonghikai kiba kham heh kyrdan (higher qualifications) bad ki nonghikai ba la kham rim (senior teachers) ki dei ban kham ïoh ïa ka jingsiew kaba kham heh shuh shuh. Ka State Pay Commission ka ju buh ruh ïa ka jingpynbeit ba ryntih (level of pay scales) ïa ki Nonghikai katkum ki kyrdan jong ki skul (categories of schools) naduh ki kyrdan primary, Upper primary, secondary, higher secondary haduh ki kyrdan lecturer ne professor ha ki college. Dei ka Sorkar Meghalaya kaba la rai (resolved) ban pynrung (inducted) ïa ki katto katne ki skul ba kham rim bad kham paw ba kin hap ha ka kyrdan Deficit. Ka jingpynrung Deficit ba khatduh (last deficit induction) ïa ki skul sha ka Deficit system ha Meghalaya ka la long ha u snem 1988 ha ka por ba u (L) PA Sangma u la long u Chief Minister ka Meghalaya bad u (L) BB Lyngdoh pat kum u Chairman jong ka State Planning Board. Naduh katei ka snem, ym don shuh ki Sorkar ha Meghalaya kiban nud ban pynrung thymmai bad kyntiew kyrdan thymmai (upgraded) sha ka kyrdan Deficit lait tang ha ki kyrdan Adhoc.
Kumno kat kane ka kambah kamsan (major govt. policy) la shu leh tang ha ka kyrdan u ophisar Sorkar marwei-ar ngut? Hato! ki lah seh ban shu pynkylla khongpong tdong-tdong khlieh-khlieh katba mon khlem ka rai ka Sorkar (cabinet decision)? Haba thaw bad rai ka Sorkar, dei ban rai bad pynduh hi da ka Sorkar. Ha kito ki snem ba ka Sorkar Meghalaya ka la shimti noh ïa ki skul primary na ki Autonomous District Councils (ADC) ruh, ka dei ka Sorkar kaba la rai rangbah ha kito ki por bad ka ïai neh haduh mynta mynne. Hato!, tharai, tang da ka bor uwei u ophisar ka lah seh ban long ban pynphai biang ïa ki skul primary sha ki ADC? Lada ki nud ban shu leh stad ïa ki jingpynduh ïa ki skul deficit, ym don jingeh ba kin leh da kaba pynphai biang ïa ki skul primary sha ki ADC. Lada lah ban leh tang da ka jingpynbna Sorkar (official notifications) jong ka Education Dept. marwei. Nangne shakhmat, ka Sorkar Meghalaya ka la dei ban husiar bha bad ban pyrkhat bha ruh ba ïoh ka paw biej bad paw lehrain ei kha ma kha hakhmat ka pyrthei lada la shu leh ïa kiei kiei ki bym dei, ki bym shong nongrim ne kiba ktah ïa ka lawei jong ki skul bad ka thoh ka pule ha ka jylla baroh kawei.
