Tura, Nailur 22
U Myntri Rangbah ka Jylla Conrad K Sangma ha ka sngi Ba-ar u la aiti ïa palat 62 tylli ki ‘sanction order’ hapoh ka Chief Minister’s Special Development Fund (CMSDF) bad ka Chief Minister’s Special Grant (CMSG) ha Tura.
Kane ka jingsam ka dei na ka bynta ki 40 tylli ki constituency ka Jylla ba kynthup ïa 54 tylli ki kam ka CMSDF bad 10 tylli ki CMSG grant ba shongdor baroh lang haduh T.3.14 klur.
Na kine ki 62 tylli ki sanction order, 32 ngut ki nongïoh bynta ki dei ki nongshong shnong kiba ïakynduh markhmat dalade ïa u Myntri Rangbah ha ka CM Dorbar ba long ha u bnai Ïaïong, Jymmang, Jylliew bad Naitung ha Tura bad ha kiwei ki jaka ka ri-lum Garo.
Ïa ki dorkhas jong ki la pynkylla sha ki ‘sanction order’ hapoh ka 105 sngi, ha kaba 11 tylli ki dorkhas na ka dorbar ba long ha u Naitung la pynlait noh tang hapoh ka hynñiew taïew. Ki 24 tylli kiba sah ki dei kiba buddien na ki record ba don ha ophis bad ki constituency register bad phra tylli ki jingtyrwa thymmai kiba wan lyngba ki MLA bad ki tnad treikam.
Kine ki ‘sanction order’ kin kyrshan ïa ka jingthaw ïa ki nongkynti paidbah ha kylleng ka ri-lum Garo. Kine ki kynthup ïa T.19.3 lak na ka bynta ki ïing skul, maramot bad paiñkhana, T.81.5 lak na ka bynta ki 16 tylli ki surok bad ki surok dewbilat, T.47 lak na ka bynta ki 6 tylli ki Community Hall bad ki Nokma Kachari Building, T.38.5 lak na ka bynta ki phra tylli ki kynroh bad check dam, T.33.2 lak ïa ki khyndai tylli ki culvert, footbridge, ki sem bad kiwei-kiwei bad T.23.3 lak na ka bynta ki hynñiew tylli ki kam ba ïadei bad ki jingïalehkai, ki samla bad ki prokram ba kyrshan ka CMSG.
Ka jingkyrshan na ka CMSG ïa ki samla ka kynthup ïa ka jingïarap pisa ban pynlong ïa ka Open Inter-School Chess Competition ha Ampati, ka Inter Mahari Football Tournament, ka Youth Excursion sha Sikkim, ka Exposure trip ki khynnah pule ka Don Bosco Secondary School Chandigre bad Dalu Govt. Higher Secondary School sha Darjeeling, ka jingleit ïashim bynta ki samla ha ka World Youth Day 2027 ha South Korea bad ka jingthied ïa ki tiar put tiar tem na ka bynta ki kynhun tem ka thaiñ.
Ïa kine ki kam yn pyntrei da ki Self Help Group, School Managing Committee, ki Sports Association, Village Development Committee bad ki Dorbar Shnong.
Napdeng jong ki, ka dei ka jingïarap ban shna ïa ka jingkieng ïaid kjat ha Chasingre, ka surok dewbilat ha Rongkhon Songgital, ka Check Dam bad ka kynroh ha Amongpara, box culvert ha Kongbangpara, School Building ka Jesus Blessing English School ha Sonagre, ka basketball court ha St. Andrew Secondary School, Building ka Babelapara Higher Secondary School, ka School Van ka St. Alphonsa’s School, ka Community Hall ha Rimrangpara, surok CC ba lah ban ïaid ki jeep ha Chengkurigre bad Gongglanggre, culverts ha wahduid Nepal Chiga, ka kynroh ha Gambal Ading, jingpynbha ïa ka madan ïalehkai ha Rongkemgre, maramot ïa ka Adhoc LP School ha Asibra bad ka kynroh ha Tewaligre Catholic Church.
