Shillong, Nailur 22
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la ong ba ki ‘Hearing’ jong ka Special Intensive Revision (SIR), 2026 kaba dang ïaid shakhmat ki la kynjoh 85.53%, ha kaba ki sah sa tang 999 tylli ki notis kiba hap ban pynpoi.
U Dr. Tiwari u la pynlong ïa ka jingkhmih bniah lyngba ka ‘online’ bad ki District Election Officer, ERO, AERO bad kiwei-kiwei ki ophisar ban khmih bniah ïa ka jingpynpoi jong ki notis, ki ‘Hearing’, ka jingpynbeit ïa ki mukotduma bad ki aplikeshon ba la thep hadien ba la pynmih ïa ka ‘Draft Roll’.
Haba pynsngew ïa ka jinglong-jingman, u la ong, “Na ki 21,69,243 ngut ki nongthep ‘vote’ kiba la shah kynthup ha ka ‘Draft Electoral Roll’, la pynmih 6,51,735 tylli ki notis. Na kine, la pynpoi haduh 6,50,736 tylli – bad sah sa tang 999 tylli ki notis kiba dang hap ban pynpoi. Baroh ki ‘Hearing’ kiba la pynlong ki don 5,57,402, kaba mihkhmat ïa 85.53% na ki notis ba la pynmih.”
U la bynrap, “Haduh mynta, la shem ba 659 ngut ki nongthep ‘vote’ kin ym ïoh lad shuh ban shah kynthup ha ka ‘Final Electoral Roll’ hadien ka rukom ba la pynkhreh, katba 17,97,168 ngut ki nongthep ‘vote’ na ka ‘Draft Electoral Roll’ la pyntip ba ki dei hok ban shah kynthup ha ka jingpynmih ba khatduh kumba ka long mynta.”
Na ki notis baroh, 2,22,786 tylli ki ïadei bad ki ‘No Mapping’ bad 4,28,949 tylli ki dei bad ki jingbym biang ha ka ‘Mapping’, ïa kaba u CEO u la ong ba dei ban da phikir bha.
U Dr. Tiwari u la bthah ruh ïa ki ophisar ban pynsted haba ïadei bad ki ‘Hearing’ kiba dang sah; haba pyntikna ba uwei-pa-uwei u nongthep ‘vote’ un ïoh ïa ka lad kaba hok bad kaba biang ban pynskhem ïa ka jinglong hok bad ban aiti ïa ki kot ki sla, da kaba pynshai ba ka jingïoh pdiang ïa ka notis kam mut ban pyndam noh beit mardor.
Hadien ka jingpynmih ïa ka ‘Draft’, ka Jylla ka la ïoh pdiang 20,948 tylli ki aplikeshon – kynthup 11,548 tylli na ka bynta ban pynrung (Phom 6), 1,220 tylli na ka bynta ban pyrshah/pyndam (Phom 7), bad 8,180 tylli na ka bynta ban pynkynriah bad pynbeit (Phom 8). U la hukum ban pynbeit ïa kine ha ka por ba la buh katkum ka rukom treikam.
U la kdew ruh ba 1,814 ngut ki ‘Booth Level Agent’ la thung da ki seng saiñ pyrthei ba la ithuh ha ka ri bad ka Jylla. Da kaba khang noh ïa ka bynta ba ïadei bad ki jingkam bad jingpyrshah ha ka 18 tarik u Nailur, ka tarik ba khatduh ban pynbeit bad pyndep ïa ki ‘Hearing’ ka long ha ka 17 tarik u Risaw, katba ka jingpynmih ba khatduh, la buh ha ka 21 tarik u Risaw.
Da kaba pynmih ïa ka jingai jingmut paidbah, u CEO u la kyntu ïa ki nongthep ‘vote’ ban peit bniah ïa ki kyrteng jong ki, ban jubab ïa ki notis bad ban wan sha ki ‘Hearing’ ha ka por kaba biang lyngba ka ‘voters.eci.gov.in’ lane ka ‘ECINET App’, bad ban pynshisha ïa ka jingpynrung kyrteng hadien ba la dep pynmih khatduh, namar tang ka EPIC marwei kan ym lah ban pyntikna ïa ki hok thep ‘vote’.
