Shillong, Nailur 22
Hadien ka jingshah thombor jong ki ophisar da kaba shah kawang petrol bom, ki pulit ka jylla ki la pynpaw ïa ka jingduna kaba khraw ha ka liang ka jingïada – kumba 40-50 tylli ki ophis ha Shillong la kynnoh ba ki treikam khlem kano kano ka jingdon ki kor CCTV.
Uwei u heh ophisar pulit u la ong ba ki jingai jingmut ki la leit sha baroh ki tnad lyngba u Deputy Commissioner.
“Ngi la thoh sha baroh ki ophis sorkar kiei ki lad jingïada kiba donkam na ka liang ka jong ki… ngi la ong ïa ki ba dei ban buh ïa ki nongap pahara ha baroh ki khyrdop bad dei ban buh ki kor CCTV ha baroh ki jaka bad dei ban buh ïa ki kali ha ki jaka ba shngaiñ. Kane ka la leit sha baroh ki ophis lyngba ka ophis jong u Deputy Commissioner,” ong u ophisar bym kwah pynpaw kyrteng.
“Ngi la ïakynduh ïa ki trai jong baroh ki petrol pump ban pynthikna ba kan ym don ka jingdie ïa ka umphniang khutia. Ïa kata la leh,” u la bynrap.
Ki pulit ki la ai ïa ka thup katkum ka jaka sha ka sorkar ban buh kyrkieh ïa ki CCTV.
“Ngi la shim ïa ka thup jong ki ophis, ki bym don ïa ki kor CCTV bad ngi la aiti sha ka sorkar ba kine ki dei ki ophis kiba khlem ki CCTV… Lehse 40-50 tylli ki ophis ki dei ki bym don CCTV,” la ong u ophisar.
U la ong ba la bthah ïa ki khlieh jong ki tnad kiba lah ban shah thombor ban pynthikna ïa ki nongap pahara baroh shisngi, katba ki pulit ki la bthah ïa ki thanad ban leit jurip man ka por.
“Na ka liang ki pulit, ngi la buh dak ruh ïa ki katto katne ki ophis kiba kongsan la ka long ki pulit kiba pahara da ki kali ne da ka kjat, ki dei ban leit peit ïa ki,” u la ong.
Haba ïakren bad u DC jong ka East Khasi Hills u Abhilash Baranwal u la ïathuh ba la pynlong ïa ki kyndon treikam Standard Operating Procedure (SOP) ba la pynlong kum ka jingbthah.
“Ki SOP ki long shai bha ba ym dei ban ieh ïa ki kali sorkar ha ki jaka ba kynjah ha ka por miet, ki chowkidar ki dei ban pahara ïa ki jaka ha ka por miet… Ki kor CCTV ki dei ban don ha baroh ki ophis sorkar kumjuh ruh ha ki khyrdop kumjuh ruh ha ki jaka bad surok ba marjan bad ruh la bthah ba ki khyrdop jong ki ophis ki dei ban khang ha ka por mynmiet,” la ong u DC.
