Shillong, Nailur 22
U Myntri Sorkar uba dei ruh u MLA ka Jirang, u Bah Sosthenes Sohtun ha ka Sngi Ba-ar u la ïathuh ba u la leit jngoh ïa ka Maikhuli hadien ka jing-jia ha ka Sngi Saitjaiñ bad u la rah ïa kane ka mat sha u Myntri Rang-bah ka Jylla bad u Symbud Myntri Rang-bah ka Jylla, ha kaba hadien kane, la phah pulit mardor ban pyntikna ïa ka jingshngaiñ jong ki paidbah nongshong shnong katei ka thaiñ.
“Ka jingleit jong nga sha Maikhuli hynnin ka sngi ka long hadien ka jingjia kaba la jia ha ka Sngi Saitjaiñ ha kaba ki la don ki kynhun kiba la wan sha Maikhuli bad pyrshang ban khang ïa ka khyrdop kaba ïalam sha Madan bad ki la byrngem ruh kumjuh,” la ong u Bah Sosthenes.
U la ong ba hadien ba la pyntip da u Rangbah Shnong bad ka seng longkmie, u la pyntip mar-mar sha ka bor ba dei khmih.
“Nga la pyntip ruh sha ki pulit bad u Deputy Commissioner bad nga la ïoh ruh ban ïakren bad u Myntri Rangbah, Symbud Myntri Rangbah ban shimkhia ïa kane bad ka Assam bad ki la phah pulit ban pyntikna ba ki nongshong shnong kin im-suk im-saiñ,” u la ong.
U Bah Sosthenes u la ong ba u la leit ha ka Lah Sngi U Blei ban khmih ïa ka jinglong-jingman bad pynlong ruh ïa ki jingïalang bad ki nongïalam shnong, ki seng longkmie bad kiwei-kiwei ki Rangbah Shnong ha ka liang ka Meghalaya, ha kaba ki nongshong shnong ki la pynpaw ïa ka jingsheptieng.
“Hynnin ka sngi nga la leit ban khmih bniah ïa ka jinglong-jingman bad kaei kaba la jia bad mano kita kiba wan ban byrngem bad pyni bor ha katei ka jaka. Ki Rangbah Shnong ki la pynpaw ba ka don ka jingsyier,” u la ong.
U Myntri u la ong ruh ba ka Sorkar ka kwah ba ki nongshong shnong ha khappud kin im khlem ka jingsheptieng.
“Na ka liang ka Sorkar, ka kwah ba ki nongshong shnong kiba sah ha khappud kin im-suk im-saiñ bad kin lait na kino-kino ki jingshah byrngem-byrsit bad jingshah thombor ne jingshah pyntieng-pynsmiej,” u la ong.
U la ong ba ki nongshong shnong ki la kyrpad ban buh pulit ki ban neh ha katei ka jaka bad ïa kane ka jingdawa la shimkhia.
“Ki la kyrpad ruh ban buh pulit ki ban shong neh ha katei ka jaka, nga la ïakren bad u Symbud Myntri Rangbah ba dei peit bad ma u ruh u la phah ïa u SP bad DC ban ai jingtip halor katei ka jingjia bad ban khmih bniah ïa ki sienjam ban shim na ka bynta ban buh pulit hangtei,” u la bynrap.
U Bah Sosthenes u la pynshai ba ka shnong Madan ka hap hapoh ka shnong Maikhuli bad kynnoh ba kitei ki kynhun ki thmu ban wan kyntur pud jubor.
“Ngi la leit hynnin ka sngi namar ba ka jingwan jong ki ka long kumba ki kwah ban byrngem bad pyntieng-pynsmiej hynrei hadien kata, ki bor distrik bad ki paid nongshong shnong ka Maikhuli ki la ïeng tylli lang kawei bad pyntikna ba kine ki briew ki shu wan ban kyntur jubor, kam dei ka jaka jong ki,” u la ong.
U la ong ruh ba ym baroh ki jingjia ha khappud ki dei na ka daw jong ka jing-ïa-ka-jia pud; don kiba la thaw da ki briew kiba pyrshang ban shim kabu.
“Teng-teng ki don ki briew kiba kwah ban shim kabu ban pynlong ishu na ka jinglong-jingman. Ki nongshong shnong ki don la ka jong ka jingsngew artatien namar man ka por, ki briew kiba sah ha ka Jylla jong ngi ki kwah ban im ha ka jingsuk bad kim kwah ïa kano-kano ka jingïakynad,” u la ong.
Haba ban jur ban pynkhlaiñ ïa ka jingpahara ha ki jaka khappud, u Bah Sosthenes u la ong, “Kum u MLA na khappud, nga don ruh ka khubor ban pynsngew sha ka Sorkar khamtam sha ki pulit ba khamtam ha ki jaka khappud ba mih ki jingeh, dei ban pynkhlaiñ shuh-shuh ïa ki ‘Police Outpost’ ne ki bor pulit ban pyntikna ba ki briew jong ngi kin im ha ka suk ka saiñ.”
Halor ka kylla ba-ar jong ka jingïakren pynbeit pud, u la ong, “Na ka liang ka Sorkar, ka la shim ïa ka jingkitkhlieh naduh ka kylla ka banyngkong bad nga kyrmen ruh ba ha kane ka kylla kaba ar mynta nga, kyrpad ïa ka Sorkar kumjuh na ka liang jong nga kaba nga don ha ka Sorkar, ngan ïakren bad ka komiti ban pynsted khnang ba baroh arngut ki Myntri Rangbah kin lah ban pynlong ïa ki jingïakren pud, kumjuh ban pynbeit ïa kane ka mat ha ka kylla kaba ar.”
