Shillong, Nailur 23
Ha kine ki sngi kiba mynta ka pyrthei ka la nang shai, ki briew ki la nangstad buit ha kiba bun ki liang bad katba nangmih ki sngi ki por ki briew kiba kwah ban shu kamai suk la nangbun ha kaba ki thaw ki lad ki buit ba thymmai ha ka kam tuh kam thiem.
Kham bunsien ki nongñiah trok ki ju sahmiet ne thiah jahthait ha kino-kino ki jaka ba kham shngaiñ haba lap ka miet ka ïong bad ka ju long ruh ka rukom ba ki nongñiah trok ki ju sahmiet ha ki Petrol Pump.
Ha ka miet jong ka 20 tarik Nailur 2026 ruh kiba bun ki kali, ki trok ki la sahmiet ha D’Mercy Refill Centre (Petrol Pump) kaba don ha Laitjem, ka kor CCTV ha ka por kumba 2:33 eiei mynstep ka la ïoh ringdur ba la wan rung kawei ka kali Alto kaba don ïa u Registration ML 10 D 4951 bad ba la kynnoh ba ka thmu ban tuh umphniang na ki trok kiba sahmiet ha katei ka Petrol Pump.
Lyngba ka kor CCTV la ïohi ba don arngut ki briew ha katei ka Alto, u nongñiah u la mih na kali bad ïaid swait ïa kawei ka trok bad leit hajan ka ‘tank’ umphniang ka trok bad thmu kyndang ban tuh umphniang, hynrei ki nongtrei kiba la pynlong ka jingap miet ki la mih ban bat ïa katei ka kali, hynrei katei ka kali ka la phet bak.
Katkum ka jingïathuh ki nongpynïaid ha ki jaka die umphniang kiba don ha ka thaiñ Upper Shillong, kane ka jingshah tuh umphniang ki trok ba sahmiet ha ki jaka die umphniang ka dei kaba la ju jia na ka por sha ka por bad kaba la pynlong ïa ki trai ban ap miet da ka jingthmu ban ïoh kem ïa ki briew kiba donkti.
Ha kawei pat ka jingjia ba la lah ban ïoh ïa ki durkhih ba la ring da ka kor CCTV, la ïohi ba ha ka miet 22 tarik Nailur ha ka por kumba 3:37 eiei mynstep la kynnoh ba ka dei katei kajuh ka kali ka la thmu ban tuh umphniang na kawei ka trok ba ïeng ha kawei ka jaka theh umphniang kaba don ha Mylliem bad haba ki trai kiba la pynlong ka jingap miet ki la mih ban bat ïa ka kali, hynrei u nongñiah katei ka kali u la krad bad lait phet.
Ki trai jong ki jaka die umphniang ba na ka thaiñ Upper Shillong ki pynpaw ba kin dang bteng ban pynlong ka jingap miet nangne shakhmat khnang ban pynthikna ïa ka jingshngaiñ ki trok ba ïeng shngaiñ ha ki pump ki jong ki bad ba kine ki briew kiba mlien ha ka kam tuh kin ym shlan ban leh ïa kane ka kam ha ki sngi ki por ban dang wan. Ka la don ka jingujor FIR ha ka 21 tarik u Nailur 2026 ba la soi kyrteng da u Bah Wanrapbor Kharumnuid uba long kum u Chief Manager ka D’Mercy Refill Centre bad dawa ba ki bor pulit ki dei ban thwet ïa katei ka kali bad ki briew kiba donkti ha kane ka kam.
