Shillong, Nailur 23
Ki nongrwai kiba dei ki bym ïohi ki khmat ki la kyntu ïa kiwei pat ki nongrwai ba kin sngewbha ban pynrit ïa ka ‘speaker’ haba ki rwai bad ki tem haba ki wan rwai ha Khyndailad, kum ka jingburom ïa ka hukum ba la pynmih da u Deputy Commissioner ka East Khasi Hills District.
Haba ïakren bad ki saw ngut ki nongrwai kiba ju rwai ha Khyndailad kiba kynthup ïa ka Kong Lucy Lamare, Kong Bandwina Khymdeit, Bah Donbok Nongrum bad Bah Teilan Mawblei ki la pynpaw haba ki la ïoh ïa ka khubor ba u DC East Khasi Hills u la mana ban pynheh ïa ka jingtem kumta ma ki baroh saw ngut ki la kohnguh ban pynrit ïa ka ‘speaker’ haba tem bad haba rwai.
Ki la kubur ba ka long shisha kaba ktah ïa ki paidbah kiba wan thied jingthied bad ïa kiba shong dukan lada pynheh ïa ka ‘speaker’.
“Na ka liang jong ngi, ngi la mynjur ban pynrit ïa ka ‘speaker’ hynrei don pat kiba dang pynheh kaba la ktah lang ïa ngi ki nongrwai haba ngi la pynrit ym ïohsngew shuh ïa ka jingrwai jong ngi” ki la ong.
Ki la kyntu ïa ka Sorkar ba kim dei ban pynkynriah ïa ki na Khyndailad namar ki la kohnguh ïa ka hukum u DC namar lada shah pynkynriah kan ktah ïa ki namar kim don ka jaka bylla kumba ïoh kiba ïohi ki khmat.
Ki la ïathuh haba ki la plie ïa ka ‘speaker’ ki la phah sngap ruh ïa kiba shong dukan kiba marjan khnang ba ma ki kin ai ïa ka jingsawa kaban nym ktah ïa ki khamtam ki dukan kiba shong pyrshah ïa ka ‘speaker’.
Shuh shuh ki la pynpaw ïa ka jingeh lada rwai khlem ka ‘speaker’ namar kan nym khring ïa ki paidbah namar da rwai da ka sur kam da ïohsngew than khamtam ha jaka bun briew, hynrei lada rwai da ka ‘speaker’ ka kham khring ïa kiba leit kiba wan bad ki kham ïoh ki jingïarap.
