Shillong, Nailur 23
U Myntri ka Sorkar Pdeng u Kiren Rijiju mynta ka sngi Balang u la kdew ïa ka jingwan ïasoh jong ki 8 ngut ki MLA ka UDP sha ka BJP kum ka por kaba thikna ïa ka jylla Meghalaya bad ka thaiñ Shatei Lammihngi da kaba pynskhem ba kan nang pynkhlaiñ shuh shuh ïa ka Sorkar MDA ba la ïalam da u Conrad K Sangma.
Haba pdiang burom ïa ki nongthaw aiñ ka UDP ha ophis treikam jong ka BJP ha New Delhi, u Rijiju u la ong ba ka jingkhlaiñ jong ka BJP kaba kiew haduh 10 ngut ki MLA kan pynthikna ïa ka jingïatreilang kaba kham bha hapoh ka kynhun synrop kaba synshar.
“Naduh mynta ka sngi ka Sorkar ba ïalam da u Conrad K Sangma ha Meghalaya, kaba dei ka Sorkar MDA, kan nang pynkhlaiñ shuh shuh namar ba ki nombar jong ka BJP ki la kiew. Ngin sa ïoh ïa ka jingïatreilang kaba kham bha, ka jingïasngewthuh jingmut bad ban kham sted ïa ka jingpyrshang jong ngi ban kyntiew ïa ka Meghalaya,” u la ong.
U Rijiju u la ong ba u long uba donbok ban don bynta ha kane ka sngi kum u nongïalam na ka Thain Shatei Lammihngi bad kum u Myntri ha ka Kynhun Myntri jong u Modi.
“Kum u briew na ka Thaiñ Shatei Lammihngi bad kum u Myntri ha ka kynhun jong u Modi, nga sngew ba nga long uba donbok bad kumjuh ruh nga sngewkmen haduh katta-katta ban long shi bynta jong kane ka jingïalang ban ïasoh ha ka ophis treikam jong ka BJP ha New Delhi. Ka long kaba kongsan haduh katta-katta na ka bynta ka histori saiñ hima sima jong ka Thaiñ Shatei Lammihngi, ka jingïaid lynti saiñ hima sima jong ka Meghalaya, ka dei ka por kaba pynthikna,” u la ong.
“Nga ai khublei ïa baroh 8 ngut ki MLA kiba la shim ïa ki rai kiba shlur bad kiba kongsan bha bad kiba bha da kaba rung sha ka BJP,” u la bynrap.
“Baroh 8 ngut ki MLA na Meghalaya ki la pynïasoh sha ka BJP. Ka dei ka jingkylla ha ka saiñpyrthei kaba kongsan haduh katta-katta ym tang na ka bynta ka NE hynrei na ka bynta ka ri. Nga pdiang sngewbha da ka dohnud ïa baroh ki paralok jong ngi, kiba la shah jied 8 ngut ki MLA ka Meghalaya,” ong u Rijiju.
“Ki dei ki MLA ka UDP, kaba dei ka seng riewlum kaba khlaiñ ha Meghalaya hynrei haba peit ïa ka jingkiew jong ka Thain Shatei Lammihngi bad ka jylla Meghalaya hapoh ka jingsynshar jong u Myntri Rangbahduh ka ri u Narendra Modi ha kine ki 12 snem ba la dep bad ka jingkylla kaba la jia bad ka jingïadei bad ki paidbah ka Thaiñ Shatei Lammihngi bad ka rukom pynkylla ïa ka saiñ pyrthei jong ka Thaiñ Shatei Lammihngi bad ka rukom pynroi jong ka BJP” u la ong.
