Shillong, Nailur 23
Ka United Democratic Party (UDP) kaba la ju tip kum kawei na ki seng riewlum kaba khlaiñ bad hehduh hapoh ka Jylla, mynta ka la hiar hi jrain hadien ba ki 8 ngut ki MLA napdeng ki 12 ngut ki la pynïasoh noh bad ka Bharatiya Janata Party (BJP) ha ka sngi Balang ha Delhi.
Kumba ka long mynta, ka UDP ka don sa tang 4 ngut ki MLA bad kine ki long u President ka UDP bad Myntri Sorkar Bah Metbah Lyngdoh, u MLA ka West Shillong Bah Paul Lyngdoh, u MLA ka Mawkyrwat Bah Renikton Lyngdoh Tongkhar bad u MLA ka Mookaiaw Bah Nujorki Sungoh.
Ki 8 ngut ki MLA kiba la bujli sopti ki dei u Bah Lahkmen Rymbui (Amlarem), Kyrmen Shylla (Khliehriat), Mathew Beyondstar Kurbah (Mawphlang), Synshar Kupar Roy Lyngdoh Thabah (Sohiong), Balajied Kupar Synrem (Shella), Mayralborn Syiem (Nongpoh), Pius Marwein (Ranikor) bad Bah Olan Sing Suin (Mawsynram).
Kane ka jingïasoh kala wan jia hadien ba ki nongïalam ka BJP kila kular ban leh eiei noh halor ki saw tylli ki mat jingdawa ba kongsan jong ka Jylla, kaba kynthup ïa ka jingpynrung ïa ka ktien Khasi ha ka Khyrnit ba Phra, ka jingpynkynriah ïa ka Them Metor na Them Iew Mawlong, ka jingpynjynsur ïa ka kam tih dewïong bad ka jingpynkylla ïa ka Meghalaya Residents Safety and Security Act (MRSSA) ban tehlakam ïa ka jingrung kyrthep ki briew ba nabar sha Jylla.
Katkum ki khubor kumba ka paw, na u number ba don mynta ka UDP ka lah ban hiar shuh bad lah ban sah sa tang u President marwei, namar kumba ka paw ki ar ngut ki MLA kata u Bah Renikton Lyngdoh Tongkhar bad u Bah Nujorki Sungoh ki lah ban pynïasoh noh bad ka NPP katba u Bah Paul Lyngdoh ruh kumba ka paw, imat la thikna ba un sa mih noh na kane ka seng.
Da kane ka jingïasoh, ka BJP mynta kala kiew ha ka jingdon MLA na ka 2 ngut sha ka 10 ngut hapoh ka ïingdorbar thawain ba 60 ngut ki dkhot ka Jylla. Da ka jingkiew ha ki number bad ban long ka seng kaba ar ha ka jingbun paid hadien jong ka NPP, la khmih lynti bad imat ka lah ruh ban don ka jingbujli shuki Myntri hapoh ka Sorkar MDA.
