Shillong, Nailur 23
U General Secretary barim ka UDP bad MLA barim ka Nongthymmai Constituency, u Dr. Jemino Mawthoh uba la dep rung sha ka seng BJP ha kine ki sngi u la pynpaw ka jingsngewkmen haba ki phra ngut ki MLA na ka UDP ki la wan pynïasoh bad ka BJP.
U la pynpaw ba da ka jingleit pynïasoh ki phra ngut ki MLA sha ka BJP kan dang pynkhlaiñ ïa kane ka seng kaba synroplang ha ka Sorkar ba la ïalam da ka NPP.
U la ïathuh ba ka jingrung kine ki phra ngut kan pynskhem shuh shuh ïa ka Sorkar Pdeng ba la ïalam da ka BJP ban ithuh noh ïa ka ktien khasi ha ka khyrnit kaba phra, ban plie ïa u dewiong, bad ban pyntreikam noh ïa ka MRSSA.
U la pynpaw ba ïa kine ki juh ki mat u la dep pynsngew sha ki nongïalam ka BJP ha kine ki ar bnai tam hashwa ba un rung sha ka BJP namar kine ki dei ki jingdawa kiba la slem na ki sengbhalang, ki seng saiñpyrthei. Haba kylli lano pat u Bah Paul Lyngdoh u MLA na West Shillong Constituency un rung lang sha ka BJP kumba la paw kyrteng ha kine ki sngi, u Bah Jemino u la pynpaw ba um don jingtip eiei.
U la ïathuh ba ha kine ki sngi u la ïoh jingtip na ki nongïalam bad ki khubor paidbah ba u Amit Shah uba dei u Myntri ka Sorkar Pdeng ba dei peit ïa ka tnad kam pohïing un wan sa wan jngoh ïa ka Shillong hadien ba kine ki phra ngut ki MLA ka UDP ki la rung sha ka BJP.
Haba kylli la ka don ne em ka jingpynrung Myntri biang na ka BJP, u Dr. Jemino u la ong namar ba ka jingdon ki MLA ha BJP ka la poi sha ka 10 ngut kan don beit ka jingpynkylla ha ka jingpynrung ïa ki Myntri Sorkar.
Halor ka jingshah kynnoh u Bah Metbah Lyngdoh kum u President haba la mih kine ki phra ngut ki MLA, u Dr. Jemino um shym la treh ban kynthoh namar u la ong ba ha ka jingïalam u Bah Metbah kum u President la lah ban pynkiew ïa ka UDP na ka hynriew ngut ki MLA sha ka 12 ngut ki MLA, nangta u la lah ban pynjop ïa ki ilekshon shiteng samoi bad pynieng ïa ka ophis UDP.
