Shillong, Nailur 23
Ka jingbun paid jong ka Bharatiya Janata Party (BJP) hapoh ka ïingdorbar thawaiñ ka Jylla ka la kiew na ka 2 ngut sha ka 10 ngut ha ka sngi Balang, hadien ba ki phra ngut ki MLA ka UDP ki la pynïasoh noh ïalade bad ka BJP ha Delhi.
Ïa kine ki MLA ka UDP la pdiang da u Myntri ka Sorkar Pdeng u Kiren Rijiju ha ka jingïadonlang u Nongai-ktien ka BJP uba khmih ruh ïa ka North East u Sambit Patra, u President ka BJP Meghalaya u Rikman G Momin lem bad kiwei kiwei ki nongïalam ka party.
Ki phra ngut ki MLA ki kynthup ïa u Bah Lahkmen Rymbui, Kyrmen Shylla, Balajied Kupar Synrem, Synshar Kupar Roy Lyngdoh Thabah, Pius Marwein, Mayralborn Syiem, Ollan Sing Suin bad Matthew Beyondstar Kurbah.
Haba pdiang ïa ki, u Rijiju u la ong ba ki MLA kila rai ban ïasoh sha ka BJP hadien ba ki sngewtynnad ïa kaei kaba u batai kum ka jingkylla jong ka thaiñ Shatei Lam-Mihngi hapoh u Myntri Rangbahduh Narendra Modi bad ka Sorkar NDA ba ïalam da ka BJP.
U la ong ba ka jingpynleit jingmut jong u Modi bad ka thaiñ Shatei Lam-Mihngi bad ka jingphaikhmat ka Sorkar Pdeng sha ka roi ka par kala pynkylla ïa ka saiñpyrthei ha ka thaiñ. U Rijiju u la pynïapher ïa ka rukom treikam ka BJP bad ka Sorkar Congress bala leit noh, haba kynnoh ba ka thaiñ Shatei Lam-Mihngi baroh shikatta kala shah kheiñ kum ka bym don jingmut ha ka saiñpyrthei namar ka jingduna ki nongmihkhmat ha Parliament.
Haba kren pat na ka liang jong ka kynhun, u Bah Lahkmen u la ong ba ka jingïakren ka la don la katto katne bad na ka liang ki nongïalam ka BJP na Delhi ki la kular shimkhia ïa ki jingdawa ba kongsan jong ka Jylla.
“Kane ka sngi kan dei ka sngi kaba kyrpang bha na ka bynta jong ngi baroh. Ka jingïakren ka la ïaid la katto katne. Kumba phi la ïohi, ki don ki MLA kiba dang khynnah bad ki don ïa ka thong bad kwah ban synñiang sha ka imlang sahlang,” la ong u Bah Lahkmen.
U la kdew ba ki jingdawa ki long ban pynrung ïa ka ktien Khasi ha ka Khyrnit kaba Phra, ka amendment jong ka MRSSA, ban pyllait biang ka kam tih dewïong, ban pynkynriah ïa ki Harijan na Them Iew Mawlong.
“Ïa kine baroh ki mat, ki nongïalam na Delhi ki la kular ban shimkhia. Kin sa leh noh ha kine ki khyndiat por ban wan. Dei namarkata ba ngi don mynta hangne ban rung sha ka BJP,” la ong u Bah Lahkmen.
“Ki la ai ïa ka jingkular ba kin shimkhia bad dei namarkata ka daw ba ngi la rai ban pynïasoh noh ïalade bad ka BJP naduh mynta ka sngi. Ngi buh ka jingkyrpad sha ki paidbah ba kin ai ka jingkyrshan ïa ngi,” u la bynrap. Ki nongïalam ka BJP ki la ong ba kane ka jingrung jong ki kan nang pynkhlaiñ ïa ka NDA ha Meghalaya bad ba ka Sorkar Pdeng kan sa shimkhia noh ïa ki mat ba sahteng jong ka Jylla.
