Shillong, Nailur 23
U Bah Bindo M Lanong uba dei u nongseng ïa ka UDP uba la shah pynduh tiket ha ka UDP haba u ïakhun ïa ka ilekshon MLA ha Nongkrem Constituency ha ka ilekshon ha u 2023 u la ong ba u Bah Metbah Lyngdoh kum u President ka UDP u hap ban shim ïa ka jingkitkhlieh haba ki phra ngut ki MLA ka UDP ki la mih noh ban leit pynïasoh sha ka BJP. U Bah Bindo u la ong ba wat u khun jong u President barim ka UDP u Dr. Donkupar Roy (bam kwai ha dwar u Blei) u Bah Balajied Synrem u hap mih noh na ka UDP namar u lap ïa ka jingïapher hapdeng u kpa lajong bad u Bah Metbah Lyngdoh. U Bah Bindo u la ong ba kane baroh ka jingbahkhlieh ka dei ha u Bah Metbah kum u President namar um lah ban bat ïa ki MLA.
“Wat ïa nga u nongseng ïa ka UDP um burom shuh ngan ong shuh kumno” u la ong.
U Bah Bindo u la pynpaw ka jingsngewkhia haba ka UDP kaba u la don bynta ban seng kin phet lut ki MLA namar ka dei ka seng kaba la ïalam ïa ka sorkar ha ki snem ba la dep.
U la pynkynmaw ba ka jingniew beiñ ïa u ka la sdang naduh ba la shah pynduh tiket haba u leit ban pynkhreh ïa ka ilekshon MLA na Nongkrem Constituency namar ki la ai tiket ha u Bah Lambor u bym dei u dkhot ka UDP.
Kane ka jingpynpaw u Bah Bindo ka dei namar ki phra ngut ki MLA jong ka UDP mynta ka sngi ki la leit rung sha ka BJP ha nongbah Delhi.
