Shillong, Nailur 24
U President ka United Democratic Party (UDP) Bah Metbah Lyngdoh ha ka sngi Palei u la kyntait ban kynthoh halor ka jingshah ktah ha ka kam saiñpyrthei hadien ba phra ngut ki MLA ka party jong u ki la pynïasoh sha ka BJP.
Haba kylli hato ka UDP kan pan jingpynduh MLA ïa ki, u Bah Metbah u la ong, “Ngan sa pyntip sha phi, kaei-kaei kaba don ïa ngi ban leh.”
Halor ki MLA kiba kylla sopti, u la ong, “Kito kiba la ïasoh, ai ba kin ïasoh. Kata ka dei ka rai shimet jong ki.”
Haba kylli hato ka UDP kan bud kumba leh ka Congress ban kwah pynduh jinglong nongmihkhmat jong ki 5 ngut ki MLA kiba la pynïasoh sha ka NPP, u Bah Metbah u la ong, “Ngam don eiei ban ong halor kiwei pat ki party.”
Halor ka jingkylli hato ka jinglong jingman ha ka saiñ hima sima ka la ktah ne em ïa u, u la ong, “Nga dang pyrkhat bad pynkhlaiñ ïa lade mynta.”
Haba kylli hato ki MLA kiba u shaniah ki la shet kylla ïa ka seng, u la jubab, “Hato ka dei? Nga tharai phi dei ban rung sha ka kam saiñpyrthei.”
Ki 8 ngut ki MLA kiba la pynïasoh sha ka BJP ki long Bah Lahkmen Rymbui (Amlarem), Bah Kyrmen Shylla (Khliehriat), Bah Mathew Beyondstar Kurbah (Mawphlang), Bah Synshar Kupar Roy Lyngdoh Thabah (Sohiong), Bah Balajied Kupar Synrem (Shella), Bah Mayralborn Syiem (Nongpoh) bad Bah Olan Sing Suin (Mawsynram).
Hadien katto katne kynta ba la dep ïasoh sha ka BJP, ka UDP ka la sospon ïa lai ngut na ki – kata ïa u Bah Kyrmen Shylla, Bah Mathew Beyondstar Kurbah bad Bah Olan Sing Suin – namar ba kim shym la jubab ïa ka ‘show cause notice’ ba la ai sha ki halor ka jingpynbna jong ki ban pynïasoh sha kawei pat ka party.
