Shillong, Nailur 24
U Secretary ka Khasi Jaiñtia Christian Leaders Forum (KJCLF) Rev. Edwin Kharkongor u la kynthoh ba ka jingleit ïasoh ki 8 ngut ki MLA ka UDP sha ka BJP dang shen, ka dei ka jingshet kylla ïa ka rai bala ai da u paidbah.
Haba kynthoh ïa kane, u Rev. Kharkongor u la ong kam don jingeh eiei lada ki riew shimet ki leit ïasoh bad kano-kano ka seng saiñpyrthei dalade, hynrei ka jingeh ka mih haba ki nongmihkhmat bala jied da u paidbah ki kyntiap seng.
“Kane ka sienjam ka pyni ïa ka jingkangar bor bad khwan myntoi ban ïa ka jingaiti sha ka jingsynshar kaba bha bad ka bha ka miat u paidbah,” u la ong.
Ha ka kyrwoh, u Rev. Kharkongor u la kynthoh pyrshah ïa ki nongrim treikam ka BJP, haba kynnoh ba ka pynshlur ïa ka jingsynshar kaba bun paid bad sngap jar jar pat ïa ki mat kiba kongsan kynthup ka jingjia umsnam pher jaidbynriew ha Manipur bad ka jingthombor ïa ki Khristan bad ki rit paid da ki shnat treikam jong ka.
U la kynnoh ba ka party, wat hapdeng ki skhim jingïarap, ka kyntur ïa ka mat “One Nation, One Language, One Religion” (Kawei ka Ri, Kawei ka Ktien, Kawei ka Niam) kaba buh jingma ïa ka jingithuh ba kyrpang ïa ki riewlum bad ki ritpaid.
Ha Meghalaya, u la ong, ka BJP kala leh ïa ka saiñpyrthei ban pynïaid jubor hi. Watla ka don tang 2 seat, kala pynïaid ïa ka Sorkar, bad ka jingkyntiap seng dang shen kala ai ïa ka “jingsngewthuh kaba bakla bad kaba lamler ba ka long kaba biang”, u la ong.
U Rev. Kharkongor u la ong ba ki MLA kila khaïi ïa ka jingshaniah u paidbah na ka bynta ka “X sbai rupa” bad ka nam ba shipor, da kaba duh noh ïa ka burom bad ka nongrim ba ki ïeng.
U ong ba mynta ka shong ha ki nongthep vote jong kito ki konstitwensi ba kin pynpaw ïa ka jingbitar jong ki bad ban kyntait ïa kine ki jingshim kabu.
