Jowai, Nailur 24
Ha ka jingtreikam kaba kongsan lyngba ki buit stad technology, ki pulit ka Jowai ki la lah ban lapdien bad pynïoh biang ïa haduh 47 tylli ki mobile phone kiba jah bad shah tuh ïa kiba la pynphai noh sha ki trai kiba dei hok hadien ba la dep ban pynshisha.
Ki pulit ka District lyngba ka kyrwoh ki la pynpaw ba ki la ïoh pdiang ïa kiba bun ki jingujor na ki nongshong shnong ha kaba ïadei bad ka jingjah bad ka jingshah tuh ki mobile phone jong ki naduh kine ki khyndiat por ba la dep.
Da kaba pyndonkam lyngba ki buit jingstad technology, ki bor pulit ki la lapdien bad ïoh kurup biang ïa kine ki mobile phone na ki jaka bapher bapher hapoh ka district kumjuh na shabar ka district bad na shabar ka Jylla ruh kumjuh.
Mynta ka jingtohkit ka dang ïaid ban lap ïa ka jingïaid lynti jong kine ki mobile phone bad ban tip ïa ki briew kiba kine ki tiar ki la ïaid lyngba ki kti jong ki, bad ruh ban tip kumno kine ki mobile phone ki la poi sha ki jaka bapher-bapher.
Ka jingshim ïa ki sienjam pyrshah ïa kito kiba donkti ka la ïaid shakhmat katkum ka aiñ.
Ha kajuh ka por ki bor pulit ki maham ruh ïa ki paidbah ba kin long kiba husiar ban thied ïa ki mobile phone ba la pyndonkam na ki briew ki bym lah ban ithuh ne ki nongdie bym ïoh jingbit khlem da pynshisha namar ki lah ban dei ki mobile phone kiba shu tuh.
