Shillong, Nailur 24
Watla ki 8 ngut ki MLA ka UDP ki la dep rung sha ka BJP ha nongbah Delhi mynha ka 23 tarik mynta u bnai, hynrei ka lah ban pulom namar haduh mynta kim shym pat la phah ïa ka shithi sha ka ophis u Lamphang ka ïingdorbar thawaiñ ka Jylla kaba don ha Khyndailad.
Katkum ka jingwad jingtip na ka ophis u Lamphang ka ïingdorbar thawaiñ ka Jylla, la ïathuh ba haduh mynta kine ki 8 ngut kim pat phah shithi, hynrei ka ophis jong u Lamphang ka la ïoh pdiang tang ïa ka shithi na ka UDP ban pynshitom ïa ki lai ngut ki MLA ka UDP da kaba pynsangeh treikam shipor (suspend) namar ba ki la pynkheiñ ïa ka jingtreikam ka UDP.
Ïa kane ka shithi jong ka UDP la wan aiti ha ka por 1:30 nohphai sngi jong ka 23 tarik Nailur hadien ba la mih ka khubor ba kine ki 8 ngut ki MLA ka UDP ki la rung sha ka BJP.
Ka UDP ka la phah shithi sha ophis u Lamphang ban pyntip ba ki la sospon ïa ki lai ngut ki MLA kata ïa u Bah Kyrmen Shylla na Khliehriat Constituency, Bah Olan Suiñ na Mawsynram bad u Bah Matthew Beyond Kurbah na Mawphlang Constituency namar ba ki la pynkheiñ ïa ki kyndon jong ka UDP.
Ka jingpynsangeh treikam ka UDP ïa kine ki lai ngut ki MLA namar u Bah Kyrmen Shylla bad Bah Matthew Beyond Kurbah ki la khot jingïalang paidbah ban mih noh na ka UDP bad ïa u Bah Olan Suiñ uba la kren pyrshah ïa ka seng hadien ba la wai ka CEC jong ka UDP.
Katba san ngut ki MLA ka UDP ki bym shah sospon kiba la rung sha ka BJP ki long u Bah Lahkmen Rymbui na Amlarem Constituency, Bah Pius Marwein na Ranikor Constituency, Bah Mayralborn Syiem na Nongpoh, Bah Synshar Lyngdoh Thabah na Sohiong bad Bah Balajied Synrem na Shella Constituency.
Katkum ki khubor kiba la ïoh lum la ïathuh ba ïa kine ki phra ngut ki MLA ka UDP ka shong ha ka rai jong u Lamphang u Thomas A Sangma la un pdiang ne un kyntait hadien ba ka UDP ka la sospon ïa kine ki lai ngut.
Ki khubor ki ïathuh ba ka jingthmu ban rung BJP kine ki phra ngut ka lah ban pulom namar kine ki lai ngut ki la shah sospon ha ka UDP, namar haduh mynta ka ophis jong u Lamphang kam pat ïoh pdiang ïa ka shithi na kine ki phra ngut haba ki la mih na ka UDP ban rung sha ka BJP.
Shuh shuh ki khubor ki ïathuh ba lada kine ki lai ngut ki MLA ka UDP ki shah sospon kaba mut kine ki san ngut ki MLA ki bym shah sospon kim lah shuh ban rung sha ka BJP namar lada ki rung kin shah mait ïa ka jinglong MLA namar ki la ngat ha ka aiñ kyntiap seng.
Ki khubor ki ïathuh ba lada shah sospon kitei ki lai ngut, ki dang dei hi ki MLA ka UDP tangba kim lah shuh ban phet na kawei ka seng.
Ki khubor ki ïathuh ba ka UDP haduh mynta ka kam ba ki MLA kiba dang don ha ka UDP baroh ki long 7 ngut, kata saw ngut kynthup ïa u Bah Metbah Lyngdoh uba dei u President uba mihkhmat ïa ka Mairang Constituency, Bah Paul Lyngdoh na West Shillong Constituency, Bah Renikton Lyngdoh na Mawkyrwat bad Bah Nujorki Sungoh na Mowkaiaw Constituency bad kine lai ngut kiba la shah sospon.
