Shillong, Nailur 24
U khlur ïalap ilekshon ha Sohiong Constituency ha ka ilekshon MLA ha u snem 2023 u Bah Amazing Kurbah um pat lah ban shim ïa ka rai shano ka seng un leit ban pynïasoh hadien ba u MLA ka UDP ba mynta na Sohiong Constituency u la dep rung sha ka BJP.
Haba ïakren bad u Bah Amazing Kurbah lyngba ka phone u la ïathuh hadien ba u la dep mih na ka UDP um pat rai shano ba un leit ban pynïasoh hynrei un dang peit shwa nangne shakhmat namar ka saiñpyrthei ka dang bun ki jingkylla.
Kane ka jingbym lah shim rai u Bah Amazing ka dei hadien ba u MLA ka UDP ba mynta na Sohiong Constituency u Bah Synshar u la dep lum ïa ka jingïalang ki nongkyrshan ban pynsngewthuh hashwa ban rung sha ka BJP bad ha ka 23 tarik mynta u bnai u la rung sha ka BJP sha Delhi ryngkat ki hynñiew ngut ki MLA ka UDP.
Kumban shu pynkynmaw ba u Bah Amazing Kurbah u dei u nongïalap ilekshon uba biang bha ki nia ban kawang ktieh haba u ai jingkren ïa u kyrtong ka UDP ha Sohiong Constituency pyrshah ïa kiwei ki seng.
Ha ka por ilekshon MP Lok Sabha u la kyrpad ïa ki paidbah ban jied ïa ki seng riewlum kata ïa ka UDP ne ka VPP da kaba kiar ban jied ïa ki seng na rithor kum ka Congress bad ka BJP, hynrei mynta ki paidbah ki kwah ban tip la u Bah Amazing Kurbah un leit rung ne em sha ka BJP haba u MLA ba mynta u la rung sha ka BJP.
Shuh shuh ha kine ki bnai ba la dep u Bah Amazing Kurbah u la dep pynbna ban mih noh na ka UDP namar ki daw jong u hynrei ki khubor ki ïathuh ba u dang don jingïadei bad u MLA Bah Synshar Lyngdoh Thabah, hynrei la sngewthuh ba u Bah Amazing un sa shim ïa ka rai ha kine ki khyndiat bnai haba ka ilekshon MLA ka la jan.
