Shillong, Nailur 24
U Nongïalam ka Congress ha Meghalaya u Bah Vincent H Pala ha ka sngi Palei u la maham ïa u Myntri Rangbah Conrad K Sangma ba ka party jong u ka National People’s Party (NPP) ka lah ban dei ka ‘target’ ne ka thong ban wan jong ka BJP hadien ba ki phra ngut ki MLA ka UDP ki la pynïasoh bad ka BJP ha Delhi, kaba la kyntiew na ka 2 sha ka 10 ngut ki MLA.
“Ka thong ban wan ka lah ban dei ka NPP. Nga la ïoh sngew ba kiba bun ki MLA jong ka, ki la her mynta sha Delhi. Kaba mut ka don eiei sha lyndet,” ong u Bah Pala haba kren bad ki nongthoh khubor.
Haba shim ïa ka BJP kum ka paralok ka bym lah ban shaniah, u la ong, “Ka BJP kam dei satia ka paralok kaba lah ban shaniah. Ka rukom kaba ki la leh ïa kiwei ki paralok jong ka, kan leh ruh kumjuh ïa ki paralok jong ka hangne ha Meghalaya. U Conrad K Sangma un long ka thong (target) ban wan, ki sngi jong u ki la jan kut.”
U Bah Pala u la kynnoh ba yn sa pyndonkam da ki ‘central agency’ ban pynbor ïa ka jingphet seng.
“Lada ki lah ban leh ïa ka UDP kumta kam don jingeh ne ka jingpyllait, nga tharai ba nangne shakhmat kin sa pyntieng ïa ki da ka CBI, ED khnang ba kin pyndem da lade,” u la ong.
