Shillong, Nailur 24
Haba kynnoh ïa ka jingjur jong ka jingrung tuh ki nong Bangladesh lyngba ka thaiñ Dawki, ka Pnar Student Movement (PSM) kala kyntu ïa ka Sorkar Jylla ba kan pynim biang mardor ïa ka Anti-Infiltration Directorate Check Gate ha surok Jowai-Dawki.
Ha ka dorkhas sha u Symbud Myntri Rangbah ba khmih ïa ka tnad Kam Pohïing Bah Prestone Tynsong, u President ka PSM samla Embhah Passah u la ong, ka khappud Bangladesh kala suk bha ban rung tuh ki briew hadien ba la pynpra noh ïa ka khyrdop kaba ju talasi ïa ki kali bad peitthuh ïa ka leit ka wan ki briew.
Ka PSM kala kam ba ki nong Bangladesh kila pyndonkam ïa ki jaka ba suk ban prong tuh na ka thaiñ Dawki ban rung beaiñ, kaba buh ha ka jingeh ïa ki bor pynjari aiñ bad buh jingma ïa ka imlang sahlang bad ka kamai kajih nalor ka jingshngaiñ jong ki trai ri trai muluk.
Ka PSM ka la dawa ïa ka Sorkar ban buh biang ïa ka khyrdop kaba treikam pura ha ki jaka kiba kongsan jong ka surokbah (Highway) khlem da pynslem shuh, mang bad thungkam ïa ki briew ki ban pyntreikam ïa ka aiñ, bad pynkhlaiñ ïa ka jingpeit pyrman da ki pulit, ki bor district bad ki bor syntiat ha ki surok, lynti ïaid kjat bad ki rud wah ha ka thaiñ.
Haba maham ba ka jingbym leh eiei kan pynbor ïa ki samla ban shim ïa ka lynti jingïakhih ban ïada ïa la ka Ri, ka PSM kala ong ba ka jingïada ïa ka khappud kam dei ban shu ieh khlem peit.
