Shillong, Nailur 24
Ka jinglip khah-khah ka bording ha ka shnong Sohpiañ kaba hap ha Nongstoiñ, West Khasi Hills District, ka la long kawei na ki daw kaba la ktah ym tang ïa ki nongshong shnong, hynrei ïa kiba trei kam lajong ruh kumjuh.
Ka jingktah ïa kiba trei kam lajong halor ka jinglip khah-khah ka bording, namar ka jingbym lah jong ki ban pyndep ïa ki kam ha ka por kaba biang.
Da ka jingsngewkhia halor kane ka mat, na ka liang ki nongïalam ka seng ki nongtrei kam lajong kaba la tip kum ka Ri Khasi Sepngi Federation (RKSF), ki la leit ban ïakynduh ïa u Executive Engineer ka MeECL, Nongstoiñ, ban ïakren halor kane ka mat.
Haba kren sha ki lad pathai khubor, u Bah Mawkordor Kharsyiemlieh, u la ong ba ka jinglip khah-khah ka bording kaba la ïaid mynta la shi taïew tam, ka la buh jingeh ïa ki namar ba kim lah ban trei ïa ka kam.
U la ong ba na ka liang u EE u la pynshai, ba ka jinglip khah-khah ka bording, kadei namar ki daw ka bor mariang.
Nalorkata, u la ong ruh ba watla ka bording ka long ka bym biang, hynrei ynda poi ka bill light pat ka dor ka long kaba heh.
