Shillong, Nailur 24
Ka Executive Committee jong ka shnong Mawkyrwat ka la pynrem jur ïa ki runar kiba la thombor bad pynjot pynpra ïa ka dukan jong u Secretary ka VDP Mawkyrwat ha ka 13 tarik u Nailur, 2026 kumjuh ruh ïa kiba siat da ka jri ïa ki Seng Longkmie katba ki dang ïaid pahara ïa ka ïew Mawkyrwat ban peit ïa ka shongsuk shongsaiñ hapoh ka shnong.
Ha kane ka sngi, ki nongïalam shnong Mawkyrwat kila leit ban ïakynduh ïa u Superintendent of Police (SP) ka SWKHD Bah B Jyrwa ban kyntu ïa ka tnad pulit ba kan shimkhia ban thwet ïa ki runar kiba donkti ha katei ka kam.
U Bah Newtonroy Lyngkhoi, Secretary Shnong Mawkyrwat haba ai jingkren sha ki lad pathai khubor u la ong ba naduh ba ki Seng Longkmie bad ki VDP kila shimkhia ban peit ïa ka suk ka saiñ hapoh ka shnong ka la don shibun ka jingkylla bad ka la don ruh ka jingshngaiñ ha ka ïaid ka ïeng khamtam hapoh ïew.
Kumta na ka liang ka shnong ka kyntu ruh ïa ki runar ba ki dei ban wan pyndem noh kloi hakhmat jong ka aiñ bad lada kim wan pyndem, ki bor jong ka aiñ kin pynjur ïa ka jingthwet ban kem ïa ki.
