Shillong, Nailur 24
Kumba ong ba ka jingdon ka surok, kadei u budlum jong ka roi ka par, ka ban pynmyntoi ïa ki nongshong shnong ha ka ïoh ka kot bad kiwei-kiwei, hynrei kaba sngewsih pat ka long ba ka don ka shnong kaba haduh mynta, kam pat ïoh ïa ka surok kaba bit ba biang, ba kin lah ban pyndonkam.
Kane ka shnong, kadei ka shnong Phlangdiloiñ kaba hap ha South West Khasi Hills District, kaba la don kumba shi hajar tam ei-ei ki longïing bad kiba im ha ka rep ka riang nalor kiwei-kiwei pat ki kam, ba ki trei.
Watla kane ka shnong ka la nang ïai kylla na ka por sha ka por, hynrei kaba sngewsih pat ka long ba ka surok kaba don kumba 10 kilometre ei-ei, kata na Wahkaji bad ka ban poi ha katei ka shnong, ka dang sah kumjuh watla ka la don mynta la bun-bun snem.
Ban sngewthuh kham shai halor kaei ka daw, kaba la pynlong ïa ki nongmihkhmat naduh kiba rim haduh kiba mynta, ba kin ym phaikhmat sha katei ka jingdonkam, la ïoh ban ïakren bad ki katto-katne ngut ki riew rangbah na katei ka shnong.
Ha ka jingïakren bad ki riew rangbah, ki la ong ba kane ka surok mynta ka la don kumba sanphew snem ei-ei, bad naduh ka por ba ki dang khynnah haduh mynta ka dang sah kumjuh kumba ka long.
Ki la ong ruh ba katba wan ki nongmihkhmat, ki kular ha kiba bun rukom uwei hadien uwei, hynrei haba khatduh baroh ki long hi kumjuh bad kiba mad jingeh kidei hi kiba shong ba sah ha katei ka thaiñ.
Na ka liang uwei u rangbah, u la kynnoh ba ka daw ka jingbym ïoh ïa ka surok kaba bha, kadei namar ki briew kiba kyrshan ilekshon ïa u MLA ki ju pynsngew sha u, ba lada siang noh ïa ka surok, kan long ka jingduhnong bad bynrap ba kine kidei ki briew kiba sniew tam.
