Shillong, Nailur 24
Ka khubor kaba la ïoh lum ka la pynpaw ba ki la don ki katto katne ngut ki MLA ka NPP kiba la don mynta sha Delhi hadien ba ki 8 ngut ki MLA ka UDP ki la dep rung sha ka BJP ha nongbah Delhi mynha ka 23 tarik Nailur 2026.
Katkum ki khubor ba la ïoh lum la ïathuh ba kine ki MLA ka NPP ki la leit sha Delhi namar ka don jingïakynduh bad ki Myntri ka Sorkar Pdeng hynrei haduh mynta ym pat tip la ki leit ban ïakren ïa ki kam pynroi hapoh ka Jylla ne ki leit ban ïakren na bynta ka kam saiñpyrthei.
Shuh shuh ki khubor ki ïathuh ba ki don palat 18 ngut ki MLA ka NPP kiba la don mynta sha Delhi.
Haba pyrshang ban wad jingtip la kine ki MLA ki leit sha Delhi, ki don ne em kano-kano ka jingïalang ne ki leit donkam shimet hynrei ym pat shym la lah ban pynthikna bad wat na ka liang ka ophis jong ka Meghalaya Legislative Assembly ruh la pyntip ba kam shym la don kano-kano ban phah leit jingleit ïa ki MLA shabar ka Jylla.
Hato kane ka jingleit Delhi ki MLA ka NPP ka lah ban don ka jingpynbeit ha ka saiñpyrthei, namar katkum ki jingtip ba la ïoh la ong ba ka BJP ka kwah ba ha ka Sorkar MDA-2 ka dei ban pynrung Symbud Myntri Rangbah bad pynrung Myntri ïa ki MLA ka UDP kiba la rung sha ka BJP.
Ki khubor ki ïathuh ba lada pynrung Symbud Myntri Rangbah bad Myntri ïa ki MLA ka UDP kiba dang shu rung sha ka BJP, ka lah ban don ka jingkylla bad kane kan shong eh ruh ha u Conrad K Sangma kumno ban ïaid shakhmat, lada ka dei kaba shisha.
Shuh shuh ki khubor ki ïathuh ba ha kine ki sngi ki MLA ka NPP ki la pynkhreh ban leit sha Delhi, lada ka jingrung BJP ki 8 ngut ki MLA ka UDP kan urlong bad kane ka la urlong mynha ka 23 tarik mynta u bnai.
Haduh mynta ka NPP kaba ïalam ïa ka Sorkar MDA-2 ka don haduh 33 ngut ki MLA kaba la ïoh bhah ïa ka shuki Myntri Rangbah ka Jylla, ar tylli ki shuki Symbud Myntri Rangbah bad ïoh bhah ruh sa 5 ngut ki Myntri, katba ka UDP kaba don 12 ngut ki MLA kaba synrop ka ïoh arngut ki Myntri, ka BJP bad HSPDP kaba don arngut ki MLA ka ïoh mar uwei u Myntri.
