Shillong, Nailur 24
Hadien ka jingjia shah pajut jubor ki sohshkor ha ki nongtuh na kawei ka longkmie, kaba la jia ha ka sngi U Blei, kaba la ïohi ba ki shkor katei ka longkmie ki la kad, na ka liang ka Voice of the People Party (VPP) State Youth Wing, ki la leit ban ïakynduh ïa u Superintendent of Police, Shillong City, u Bah Dangsan Khyriem, ban ïakren halor kane ka jingjia.
Haba kren sha ki lad pathai khubor, ki nongïalam ka VPP Youth Wing, ki la ïathuh ba ki pulit ki la kem ïa u wei u nongtuh, uba la shah bat ha ki paidbah myn ha katei ka sngi hynrei ki la pyllait noh tang hadien ka 24 kynta, namar ba ki ong ba hap ïaid katkum ka aiñ, lada kem ïa utei u nongtuh.
Katkum ka jingïoh jingtip, une u nongtuh u dei u nongshong shnong na ka thaiñ Nongstoiñ.
Ki nongïalam ka VPP ki la ïathuh, ba na ka liang ki paidbah nongshong shnong mynta ki la don ka jingsyier mynsiem namar ba ki ïohi ba utei u nongtuh, u la ïaid sahuh biang hapoh ka shnong. Kumta ki paidbah ki don ka jingsyier mynsiem, namar ba une u nongtuh, la ong ba u dei uba la don bynta ha kiba bun ki kam sniew hapoh shnong poh thaw.
“Ki pulit kim lah ban set ïa une u briew, namar ba u don ha ka jingkyrni dih drok,” la ong ki nongïalam ka VPP.
“Ngi sngewthuh shai ba kum kine ki jingjia, kin dang kharoi bad ka jingjyllei ha ki kam tuh kam thiem ka la nangkiew, namar ba wat u nongpajut sohshkor ruh u la lait noh tang hapoh ka 24 kynta na ka jingshah kem. Ha ka jingïakren ka seng bad u SP Shillong City, u la ong ba hap ban ïaid katkum ka aiñ,” ong ki nongïalam ka VPP.
Kumta ka VPP ka la kyrpad ba ym tang ban shimkhia tang na ka liang ka tnad pulit, hynrei ki dorbar shnong, seng samla, bad baroh ki paidbah, kidei ban ïa shimkhia lang, ban ïatreilang bad ki tnad bapher-bapher, khnang ban yn lah ban weng ïa kum kine ki jingjia baroh.
