Shillong, Nailur 25
U Lamphang ka ïingdorbar thawain u Thomas A Sangma uba leit jingleit shabar ka ri, un sa wan phai sha Shillong lashem taiew bad un ioh ban leit shong sha ophis ha ka 5 tarik u bnai ban wan u Risaw 2026.
Haba iakren bad u bah Andrew Simon uba dei u nongaibuit u Lamphang ka ïingdorbar thawain, u la iathuh hadien ba u Lamphang u la wan shong ophis un sa bishar shwa ia ka shithi ba la phah da ka UDP kaba la sospon ia ki lai ngut ki MLA ka UDP.
Ha ka juh ka por u la iathuh ba u Lamphang un sa khot iakren kyrpang ia u bah Mayralborn Syiem u MLA ka Nongpoh namar ba u khlem wan mih dalade ban pyntip ba u la dep pyniasoh sha ka seng BJP.
U la iathuh ba kan nym don eiei lada u MLA u khlem wan mih namar u don ki daw bym lah kiar namar u la dep soi ha ka shithi ba la dep phah sha u Lamphang, tangba u Lamphang u hap ban khot biang ia u sha ophis ban ioh jingshai.
Kane ka jingkhot kyrpang u Lamphang ia u Bah Mayralborn ka dei namar ki 7 ngut ki MLA ka UDP kiba la dep pyniasoh ialade sha ka BJP ki la wan hi dalade sha ophis u Lamphang hapoh ka jingialam u bah Sanbor Shullai uba dei u Chairman jong ka Legislature Party ka BJP uba dei ruh u Myntri ha ka sorkar jylla.
Kine ki lai ngut ki MLA ka UDP kiba la shah sospon ha ka UDP ki long u bah Kyrmen Shylla na Khliehriat, bah Olan Suin na Mawsynram bad bah Matthew Beyond Kurbah na Mawphlang constituency.
Kum ban shu pynkynmaw ka UDP ka la dep pyntip sha u Lamphang ha ka 23 tarik mynta u bnai ba ki la sospen ia kine ki lai ngut ki MLA halor ka nongrim ba ki la pynkhein ia riti pyniaid kam ka UDP.
Ka jingsospon ka UDP ia ki lai ngut ki MLA halor ka nongrim ba u bah Kyrmen Shylla bad bah Matthew Beyond Kurbah ki la pynlong jingialang ban mih noh na ka UDP katba u bah Olan Suin uba la kren hakhmat ka ophis UDP ban mih noh ban leit pyniasoh sha ka BJP.
Ka jingsospon ka UDP ia ki lai ngut ki MLA ka shim ba ki dang dei ki MLA bad haba la sospen kim lah shuh ban phet na kawei ka seng. Kane ka jingsospon ka UDP ia ki lai ngut ka long ban khanglad ia ki san ngut kiba la rung sha ka BJP ba kin ngat ha ka ai kyntiap seng.
