Shillong, Nailur 25
U Myntri Sorkar bad nongmihkhmat ka Amlarem, u Bah Lahkmen Rymbui, ha ka Sngi Thohdieng, u la kyntait halor ki jingïakren ba ïadei bad ka jingdawa shuki Myntri hadien ka jingpynïasoh jong 8 ngut ki MLA barim ka UDP sha ka BJP, da kaba ong ba ki mat bad ki jingangnud jong ka jaidbynrew ki kham khraw ban ïa ki kyrdan.
Kine ki 8 ngut ki nongthaw aiñ, hadien ba ki la aiti ïa ka shithi pynïasoh jong ki sha u Lamphang ka Ïingdorbar Thawaiñ, la pdiang sngewbha bad ai khublei kyrpang ïa ki da u State-President ka BJP, u Rikman G. Momin bad u Nongïalam ka ‘Legisla-ture Party’ bad Myntri Sorkar, Bah Sanbor Shullai ha ka ophis treikam bathymmai jong ka seng.
Haba jubab la ka jingïoh shuki Myntri ka long ne em shi bynta jong ka jingïateh, u Bah Rymbui u la ong, “Kane ka jingdawa shuki, la ka don ne em, kam don ha ka jingtip jong nga, ki nongïalam ba halor ki lah ban tip, ngam lah ban ong eiei.”
U la pynskhem ba kane ka sienjam kam dei shaphang ka shuki.
“Hynrei kaei kaba ngi la buh hakhmat ka long ba ïa ka shuki ngim lah ban ïapeiñ bad ki mat jong ka jaidbynriew, ngi hap ban pyrkhat ïa kata, kam long kaba suk, ngi hap ban peit ïa kaei kaba ngi buh hakhmat eh,” bynrap biang u Bah Rymbui.
U Bah Rymbui u la ong ba katei ka kynhun ka la mih noh na ka UDP da ka jingsuk mynsiem bad da ka jingthmu kaba shai ban buddien pat ïa ki jingangnud kiba dang sahteng jong ka Jylla.
“Ngi la iehnoh ïa ka seng barim jong ngi da ka mynsiem kaba suk ba saiñ, khlem kano-kano ka jingsngewsih namar kumba la ong, kaei kaba ngi donkam kum ki nongïalam, ngi donkam ïa ka jingïada, ngi donkam ïa ka roi ka par,” u la ong.
U la ong ruh ba ka kynhun ka la pynsngew hakhmat ki nongïalam ba halor jong ka seng (ha Delhi) ïa ki mat kiba kynthup ïa ka FCRA, ka jingpynrung ïa ka ktien Khasi bad Garo ha ka Khyrnit kaba 8, ka ILP, ka jingpynkylla ïa ka MRSSA, ka jingpynkynriah ïa ka Them Ïew Mawlong, ka jingpynsuk ïa ki kyndon tih dewïong bad ka ‘Minority Status’ ïa ki jingngeit niam tynrai kum ka Niam Tre bad ka Niam Khasi.
“Ngi la kren shai hakhmat ki nongïalam ba halor jong ka seng shaphang kaei ka jingangnud jong ki briew jong ngi, na ka bynta ka Jylla bad na ka bynta ki nongshong shnong,” u la ong.
Halor ki jingpyntikna ba la ïoh, u Bah Rymbui u la ong ba ka la don ka jingjubab kaba manbha.
“Nga la pynpaw ïa kine ki mat ha ka ktien Khasi bad phareng bad ka jubab jong ki nongïalam ba halor, ka long ba ki don ka jubab kaba manbha halor kine ki mat baroh. Kumta ngam lah ban batai bniah halor kata, kam dei kaba mih na ka shyntur jong nga, ka dei kaba mih na ka shyntur jong ki nongïalam ba halor. Ngi dei ki briew kiba don ïa ka jingmut kaba manbha, to ngin long kiba manbha,” u la ong.
