Shillong, Nailur 25
Ka Hynñiewtrep Youths’ Council (HYC) ka kyntu ïa ka North Eastern Indira Gandhi Regional Institute of Health and Medical Sciences (NEIGRIHMS) ba ka dei ban shimkhia ban thungkam noh mardor ïa ki Nursing Officer ba thylli.
Ka HYC ka la aiti da ka jingthoh sha u Direc-tor jong ka NEIGRIHMS ha kajuh ka por ka la ïakynduh ïa u ban pynpaw ïa ka jingsngewkhia ïa ki jingdawa kiba dang sahteng.
U President ka HYC u Bah Roy Kupar Synrem u la ong ba ka HYC ka la dawa ba ka jingpynbna thungkam Nursing Officer ka dei ban long katkum ka ratio 80:20 hapdeng ki kynthei bad ki shynrang.
“Ka HYC ka la pynskhem ba kum kane ka jingpynbeit ïa ka jingdon nos shynrang bad kynthei ka long kaba donkam haba pyrkhat ïa ki jingdonkam ha ka jaka ai jingsumar hapoh ki hospital khamtam ha ki jingsumar Obstetrics bad Gynaecology, Mater -nity Care, Paediatrics, Neonatal Care, Post-Operative Care” la ong u Bah Roy.
Katkum ka jingai rai jong ka Ïingkashari Bombay dang shen, kaba la kdew ba ha ka mukotduma Niketan Prakash Lingayat & Another pyrshah ïa ka Jylla Maharashtra bad kiwei, ha ka 12 tarik u Lber 2026 ka la rai ba ki rukom thungkam jong ka Sorkar Pdeng kiba la don lypa ha ki jaka pule kum ha AIIMS, ka JIPMER bad kiwei kiwei dei ban ai 80:20 kynthei shynrang ha ka jingthung kam ïa ki Nursing Officer.
Shuh-shuh u Bah Roy u la pynshai ba katei ka jingdawa kam dei pyrshah ïa ki Nurse Officer shynrang.
“Ka jingdawa kam dei pyrshah ïa ki Nurse shynrang, hynrei ban pynthikna ïa ka rukom thungkam kaba dei katkum ka jingdonkam ïa ki Nurse kynthei ha ki jaka treikam kaba long ka bynta ba kyrpang jong ki nongpang, ka burom bad ka jingsumar ïa ki synrang kynthei ka long kaba kongsan: u la ong.
Ka HYC ka la kyntu ïa ka NEIGRIHMS ban ai jubab da ka jingthoh bad ka jingthmu treikam kaba khuid ba shai bad kaba khlem da pynslem ïa ki kam kiba lait. “Ki bor pynïaid ka NEIGRIHMS ki dei ban shimkhia mardor ïa kine ki jingdawa kiba dei hok na ka bynta ka jingmyntoi jong ki nongpang bad ki paidbah ka Meghalaya kumjuh jong ka thaiñ shatei lam-mihngi baroh kawei” u la bynrap.
