Shillong, Nailur 25
Ka Mawïong View Point ka dei kawei na ki jaka ba ki nongwan jngohkai pyrthei ba na kylleng ki muja bha ban pynlud por ban sakhi ïa ka jingitynnad jong ka Mariang khamtam ka jinglah ban ïohi ïa ka jingitynnad ka pung Umïam.
Haba pyrshang ban leit sakhi ha katei ka jaka la lap ba ka long pynban ka jaka ba isaitmet bad kaba dap da ki jaboh jabaiñ ki plastik namar ka jingleh bymsuidñiew ki briew ïa ka Mei Mariang bad ka jingitynnad jongka.
Nalor ka jingjaboh, la ïohi ruh ïa ka jingpynleh nohei ïa ka pisa paidbah haba ïadei ki jingtei ïa ki 10 tylli ki dukan ba don harud surok, hynrei kumba ka long mynta ymdon nongpyndonkam ïa kine ki dukan bad kine ki dukan ki satah da ki jingthoh jingdro ba khlem akor bad kiba la sdang ban jot bad pra, kiba kylla long ruh ka ktem awria bad ki kam sniew ba bunjait.
Katkum ka jingïathuh u Bah Kitkupar Sun President ka United Hynniewtrep Movement (UHM) Mawlai Circle ha ka miet 23 tarik u Nailur 2026, ki la lap bad ïohi ba ki bar Jylla kynthei bad Shynrang kiba la mih na kitei ki dukan, kaba la pynsuba sniew ïa ki dkhot ka seng bad pynlong ïa ka jingjurip.
Shuh-shuh u la ïathuh haba ki dkhot ka UHM ki la leit ban peit ban jurip ïa ka jinglong jingman kitei jingtei la lap pynpan ki jingbymbit bym biang kum ka jingbymdon bor jingshai (Light) kumjuh kitei ki dukan ki la jot kaba la buh jingma shibun ïa ki briew.
Ka UHM Mawlai Circle ka la buh ka jingkyntu jur ïa ki bor ba dei peit ïa katei ka jaka ba ki dei ban leh eiei noh mardor ïa kitei ki dukan ba la tei khlem don ban pyndonkam, khnang ban ym mih kino-kino ki jingjia ba lah ban pynjah burom ïa ka Ri Khasi bad ka Jylla Meghalaya.
