Shillong, Nailur 25
U MLA ka BJP na South Shillong Konstitwensi, u Bah Sanbor Shullai u la kheiñ kam kai ïa ka jingkynnoh ka Congress pyrshah ïa ka Election Commission bad pynksan ïa ka jingnang kiew ka BJP ha Meghalaya hadien ka jingwan ïasoh ki 8 ngut ki MLA ka UDP sha ka party.
Haba kynthoh ïa ka jingïakhih ka Congress pyrshah ïa ka Election Commission, u Bah Sanbor u la ong ba kane ka Liang Pyrshah ka la pynmih ïa ki jingkynnoh khlem ki jingshisha.
“Ngam lah ban kynthoh eiei haba ïadei bad kine ki kam. Hynrei ka Congress, naba kidei, phi ïohi, kane kadei ka kam jong ki Liang Pyrshah. Ka kam jong ki Liang Pyrshah ka long tang ban pyrshah beit” u la ong.
U Bah Sanbor u la kynthoh ïa kane halor ka jingkynnoh u President ka Meghalaya Pradesh Congress Committee (MPCC) Bah Vincent H Pala, ba u Chief Election Commissioner u la pynïaid ha la ka mon ïa ki ilekshon hapoh ka ri. U Bah Pala u la dawa ruh ïa u CEC ban hiar shuki bad ban thung ïa ka jingtohkit ïa ka rukom treikam jong u.
U Bah Sanbor u la ong ba ka Election Commission ka la dep pynshai ïa ki jingkynnoh ba la pynmih da ka Congress bad ong ba ki jingkynnoh kidei ki bym don nongrim.
Ha kajuh ka por, u Bah Sanbor u la kyrshan ïa ka rai jong ki 8 ngut ki MLA ka UDP, ba wan ïasoh sha ka BJP bad ong, ba kadei ka sienjam bad ka jingïohi jngai ha ka saiñ pyrthei.
Kine ki 8 ngut ki MLA ki la leit ïasoh sha ka BJP ha New Delhi ha ka 23 tarik u Nailur, kaba la pynbun paid ha ka jingdon MLA ka party na ka 2 ngut sha ka 10 ngut ha Meghalaya.
U Bah Sanbor u la kyntu ruh ïa kiwei ki MLA ba kin wan ïasoh noh sha ka BJP, haba pynpaw ba ka jingïatreilang kaba jan bad ka Sorkar Pdeng kan ïarap ïa ki konstitwensi jong ki ban ïoh bun ki kam pynroi.
“Nga kyrpad ruh ïa kiwei ki MLA ba kin wan shakhmat bad ïasoh bad ngi, kin sa ïoh bun bah ki kam pynroi, ki konstitwensi jong ki, kin kiew, u tiew lotus, ka BJP kin phuh” u la bynrap.
