Nongstoiñ, Nailur 25
Ka jingïañia ktien bad ka jingïa-ka-jia hapdeng ki ar liang mamla ka la mih ka jingïashoh ïadat myn ha ka janmeit jong ka 24 tarik u bnai Nailur, 2026 hapoh ka Shnong Langja, West Khasi Hills.
Ha ka jingwad jingtip halor kane ka khubor, u Superintendent of Police ka West Khasi Hills, u la ong ba ka daw ka dei ba ka la don ka jingïañia ktien bad ïa-ka-jia ruh hapdeng ki ar liang mamla, kata hapdeng ki briew shnong bad u Michael Sangma namar ka jingthmu ka jong u ban ïaid beit-beit da ka kali jong u na ka jingkhang khyrdop ka shnong hapoh ka surok shnong kaba dei na ka skhim MGNREGS.
U SP u la ong ruh ba lyngba ki jingtohkit ba ki pulit ki la ïoh ban lum, la ong ba u Michael Sangma ha katei ka miet jong ka 24 tarik u Nailur, u la pyrshang ban ïaid beit lyngba ka kali jong u na ka jingkhang khyrdop ba la pynïeng da ki bor shnong.
Shuh shuh ka khubor na u SP ka ong ruh ba lyngba katei ka jingleh u Michael Sangma, ka la pynbitar ïa ki longkmie napoh ka shnong kaba la pynlong bad pynmih ruh ïa ka jingïamai ïañia kaba nyngkong duh bad suki-suki ki paidbah ki la sdang ban ïa khluit bha bad ïalum ha katei ka jaka hynrei ha katei ka por, u Michael Sangma u la leit noh sha la ïing.
La ong ruh ba hadien katei ka jingjia katkum ka jingkynnoh u Michael Sangma, la ong ba hadien ba u la poi shala ïing, ki katto-katne ngut ki longkmie ki la wan bad pyrshang ban sei ïa u shabar kaba la wanrah ruh ïa jingïania kaba jur ha kaba ka la don ruh ka jingïashoh ïadat.
Nangta, la kynnoh ruh ba ki paidbah ki la shoh ïa u Michael Sangma bad ïa kiwei pat kaba la pynlong ruh ïa ki paidbah ban pynjot ïa ka kali jong u bad khynñiat ruh sha khap ka surok hynrei la lah ban tem noh ïa katei ka jingjia lyngba ka jingwan poi jong ki pulit ka Langpih BOP bad haduh ka por 11 baje mynmiet la lah ban pynpra noh ïa ka jingïalum paidbah.
Hynrei ha kapor 1 baje mynstep, katba ki pulit ki dang leit phai sha la ka ktem pulit sha Langpih BOP, ki pulit ki la ïoh jingtip ba ka kali jong u Michael Sangma ka la shah thang.
Ka khubor na u SP ka ong ruh ba halor katei ka jingjia na ka liang jong ki nongïalam shnong, ki la ujor da ka ejahar da kaba ki la kynnoh ruh ba u Michael Sangma u la ktah kti ïa ki longkmie kiba leit sha ka ïing sah jong u ban ïakren halor ka jingthmu ban ïaid jubor ka jong u na ka khyrdop ba la khang da ka shnong bad ki la kynnoh shuh-shuh ba u Michael Sangma u la pynmynsaw ruh da ki tiar ba nep ïa ar ngut ki rangbah kiba dang pyrshang ban tem ïa ka jingïamai ïania jong u bad ki longkmie.
Halor kane ka jingjia, la ong ruh ba na ka liang jong ki pulit, ki dang bteng ban pynlong ka jingtohkit kaba bniah halor katei ka jingjia.
