Shillong, Nailur 25
Ka nongthaw aiñ ka NPP bad nongai buit ka Sorkar MDA, ka Dr. M. Ampareen Lyngdoh ha ka Sngi Thohdieng ka la ong ba ka jinglong-jingman kaba ïadei bad ki 8 ngut ki MLA ka UDP kiba la pynïasoh sha ka BJP ka long kaba dap da ki hamsaïa.
“Kane ka jingjia baroh kawei ka dap da ki hamsaïa. Bun ki jingtip kiba bakla ki saphriang sha ki paidbah. Kumta, ki hamsaïa ki hap ban kynriah shadien bad ka jingshisha ka hap ban shim ïa ka jaka jong ki,” ong ka Dr. Lyngdoh sha ki nongthoh khubor.
Da kaba ban jur ba ka don ka Sorkar kaba skhem ha ka Jylla, ka la ong, “Wat pyni ba ka long kum bym don Sorkar shuh ha ka Jylla Meghalaya. Ngi dei ma ngi kiba bat ïa ka bor synshar bad ngi pyndep ïa ki jingpynïaid kam jong ngi kum ka Sorkar.”
Ka la ong ba u Myntri Rangbah ka Jylla, u Conrad K. Sangma bad ki 2 ngut ki Symbud Myntri Rangbah ka Jylla ki don ha ka kam bad ki dang ïakren bad ki 8 ngut ki nongthaw aiñ.
“Sangeh noh ban pyni ba ka long kumba shen ka Meghalaya kan ym don Sorkar shuh, kata kam dei kaba shisha. Ka jingsynshar ka dang ïaid shakhmat bad ngin ïai bteng haduh u snem 2028 katkum ka jingbthah jong ka aiñ. Ngi don ka jingshaniah kaba pura hapoh ka jingïalam jong u Myntri Rangbah ka Jylla jong ngi, u Conrad K. Sangma bad ki 2 ngut ki Symbud Myntri Rangbah ki ban ïalam ïa ka Jylla shakhmat,” la ong ka Dr. Lyngdoh.
Haba kyntait ïa ki jingkynnoh ba baroh ki kam ki jam la sahkut lut, ka la ong, “Sngewbha ailad ïa ka Sorkar ban pyndep ïa ka kamram jong ka kum ka Sorkar ha ka synshar-khadar. Ki seng saiñ pyrthei kin shim la ki jong ki sienjam. Kam long kumba baroh ki la sahkut lut. Ngi dang trei shitom bad ngi dang shu ïoh ïa ka ‘Workshop’ kaba kongsan bha.”
Haba kylli halor ki 8 ngut ki MLA, ka Dr. Lyngdoh u la ong, “Ki dei kiei? Ngam shym la ïakynduh ïa ki. Ngam shym la ïakynduh ïa ki 8 ngut ki MLA bad ngam tip kaei kaba don ha ka jingmut-jingpyrkhat jong ki.”
“Ngam tip kaei ka jingeh jong ki, ngam dei ka dkhot jong ka UDP, nga dei ka NPP. Teng-teng ïa kaei kaba la kren ruh la pynkyllaiñ. Ym don jingkren lorni ka ban pynsngewtynnad ïa nga, nga shisha ngam sngewtynnad,” ka la ong haba kren halor ka jingkynnoh ba ki MLA ki la mih noh namar ka jingbym don ka roi ka par.
Ka la ong shuh-shuh ba kam dei ka kam jong ka ban kren eiei halor ka rai jong kiwei pat ki nongthaw aiñ.
“Ha ka jingshisha kam dei ka kam jong nga kaei kaba u nongthaw aiñ u leh. Kaei kaba ki kwah ban leh ka dei ka bynta jong ki, hato kin jop ne kin rem, ki tip kham bha ma ki. Ngam shong ngam sah ha kawei ruh na kine ki 8 tylli ki konstitwensi, ka konstitwensi jong nga ka long kaba skhem,” ka la ong.
“Ngan pynleit jingmut ban pyntikna ba ki paidbah jong ka konstitwensi jong nga kin ïakynduh ïa ka MLA jong ki haba ki leit ha ka por 8 baje mynstep. Kaei kaba kiwei pat ki leh kam don jingïadei eiei bad nga,” ka la bynrap.
Haba kyntait ïa ki khubor ba ka leit sha Delhi, ka Dr. Lyngdoh ka la ong, “Nga dei ka nongthaw aiñ bad nga don hangne ha Shillong, ngam shym la leit shano-shano ruh, kumta sangeh noh ban pynlong kumba phi ïohi ïa nga ha ka liengsuiñ bad ba phi la synran lang ïa nga sha Delhi.”
