Shillong, Nailur 25
Ka Meghalaya College Teachers’ Association (MCTA) ka la ther tyngeh ïa u Myntri Rangbah ka Jylla u Conrad K Sangma ba un kynmaw ba u dei uba mih na ka Deficit System namar ba u kpa jongu, u dei uba la seng la pynlong ïa ka Deficit Grand In-aid System.
Ïa kane la pynpaw da u Bah David Marbaniang u ba long u Executive Member jong ka MCTA haba ai jingkren ha ka jingïalang ba la pynlong ka Khasi Jaintia Deficit School Teachers Association (KJDSTA) bad ka Garo Hills Deficit School Teacher and Employes Association (GHDS&TEA) kaba la long ha ka Sngi Thohdieng ha madan Malki, Shillong.
Haba kren u Bah David u la ai mynsiem ïa ki nonghikai Deficit kiba pynlong ka jingïakhih halor kiba bun ki mat jingdawa, u la ong ba donkam ka jingïatylli, kam pher la ki dei ki nonghikai kiba ai jinghikai ïa ki kyndan pule ba kham rit khan hapoh hynrei kaba donkam ka long ban don ka jingïatylli, ka jingïatylli ki nonghikai bad ki kynhun jong ki nonghikai ka Jylla ka long ka long kum ka kynroh ba skhem.
Shuh-shuh u la ong ba bun ki Politician ki mih na ki skul Deficit, kum u Conrad K Sangma um dei ban pynpra ïa kaba u kpa jong u, kata u Purno Agitok Sangma u la saiñ pynshong nongrim mynba u dang im bad mynba u dang long u nongïalam ba khraw ka Jylla.
