Shillong, Nailur 25
U MLA ka West Shillong Konstitwensi, u Bah Paul Lyngdoh u ong “Ym donkam ban kynnoh ne jingïa tharai ba ngan rung sha ka party Bharatiya Janata Party (BJP). U la ong ba mynta kum u nongïalam ba la jied da ki paidbah, nga dangdon ka jingpan jingmut bad kynjoh ktien na ki nongkyrshan ka UDP, West Shillong Konstitwensi.
“Kane ka jingkhih mynta, kan sa poi haduh u pud ba u MLA ka party UDP, un sah sa tang u wei lane ar ngut. Te ngi dei ban ïeng ha ka nongrim, ba kumno ngin ïaid nangne shakhmat” u la ong.
Haba kylli, u Bah Paul u la ong ba um don ka jingkyndit eiei halor ka jingleit pynïasoh ki MLA ka UDP sha ka BJP, namar la shi snem mynta ngi la dep ïohi ki dak ki shin jong ka jingorpait.
