Shillong, Nailur 27
Ka ju long ha ki snem kiba mynshuwa ha ka por ba ki seng lehnoh ki dang khlaiñ hapoh kane ka Jylla, ba ki nongïalam seng saiñ pyrthei kyrpang ïa kito kiba don ha ka bor synshar ba ki donkam ban long kiba phikir ha ka ïaid ka ïeng, hynrei ym ju da kham ïohsngew shuh mynta.
Lah ban ong ba ïar ruh ban ïohsngew, ba ki nongmihkhmat kiba don ha ka liang pyrshah kin ïoh ka jingbthah ha ki bor syntiat ki pulit ïa ka ïaid ka ïeng hynrei dangshen, lyngba ki tyllong khubor la ïoh jingtip ba ki bor syntiat ne kita ki intelligence ki la phah jingthoh sha u Bah Ardent Miller Basaïawmoit, President ka VPP, ba un long ba phikir ha baroh ki liang.
Ban shai halor kane ka bynta, ha ka jingïohlad ban ïakynduh bad u Bah Ardent, la buh kyrpang ïa kane ka jingkylli khnang ban ïoh jingpynshai.
U Bah Ardent u la ong ba ki bor pulit ki la ong ba un hap ban shim ki jingïada, hynrei u la ong ba na ka liang jong u hi, um da kham sngew lei lei haduh katta katta.
“Ka party VPP kadei ka party kaba synshar ïa ka jingkhuid bad jingsniew, namarkata kiba sniew kin wit haba ngi trei ban pynjah ïa kaba sniew,” la ong u Bah Ardent.
Haba jylli, u Bah Ardent u la ong “Nga don ka jingngeit kaba skhem halade, bad ka jingim jong nga ka shong ha ka kti jong U Blei. Nga pyrshang ruh ban im ka jingim ban phikir ha ki liang baroh. Te nga sngewthuh shai ba ka jingim bad jingïap jong nga ka shong ha ka kti jpong U Blei”.
Namarkata, u la ong ruh ba u ïohi shai ba ha u snem 2028, ka VPP kan wan ha ka bor bad um don ka jingartatien. Kumta haba ka VPP kan sa synshar ha u 2028, ngam ngeit ba U Blei un shim noh ïa ka jingim jong nga.
“Kan don ka jingthmu ba sniew ïa ka jingim jong nga, hynrei ngam tieng,” u la bynrap.
