Shillong, Nailur 27
Ka United Democratic Party (UDP) ka dang ap ïa ka rai jong u Lamphang ka Ïingdorbar Thawaiñ, u Thomas A. Sangma hadien ba ka la shim ïa ka sienjam ban phah mait kyrteng ïa ki 8 ngut ki MLA jong ka kiba la leit pynïasoh noh sha ka Bharatiya Janata Party (BJP).
U khlieh nongïalam ka seng uba dei ruh u nongïalam ka Parliamentary Party (PP), u Bah Metbah Lyngdoh u la mudui da ka ‘Petition’ hakhmat u Lamphang ban dawa leh eiei pyrshah ïa ki nongmihkhmat katkum ka aiñ kyntiap seng ne ka ‘Anti-Defection’.
“U nongïalam ka PP u la dep ban ujor da ka ‘Petition’. Mynta ka rai ka shong ha u Lamphang halor kaei ka sienjam kaba un shim,” ong uwei na ki nongïalam ba rangbah ka UDP.
Ki 8 ngut ki MLA kiba la pynïasoh sha ka BJP ha New Delhi ha ka 23 tarik Nailur ki long u Myntri Sorkar Bah Lahkmen Rymbui (Amlarem), Bah Kyrmen Shylla (Khliehriat), Bah Mathew Beyondstar Kurbah (Mawphlang), Bah Synshar Kupar Roy Lyngdoh Thabah (Sohïong), Bah Balajied Kupar Synrem (Shella), Bah Mayralborn Syiem (Nongpoh), Bah Pius Marweiñ (Ranikor) bad Bah Olan Sing Suiñ (Mawsynram).
Hashuwa, ka UDP ka la pan jingpynshai ne phah ‘show-cause notice’ sha kitei ki 8 ngut ki nongthaw aiñ hadien ba ki la pynbna ïa ka rai ban pynïasoh noh sha kawei pat ka seng. Hadien kane, ka seng ka la sospon ïa 3 ngut na ki – Bah Kyrmen Shylla, Bah Mathew Beyondstar Kurbah bad Bah Olan Sing Suiñ – namarba kim shym la jubab halor katei ka bynta.
Ïa ka hukum sospon ruh la aiti sha u Lamphang.
Ki tyllong khubor jong ka seng ki la kynthoh ba ka jingkam pynïasoh jong ki 8 ngut ki MLA kam long kaba dei, namarba ym shym la bud ïa ka rukom treikam kaba dei.
Kane ka jingphet seng ka la pynhiar ïa ka jingdon nongmihkhmat jong ka UDP hapoh Ïingdorbar na ka 12 sha ka 4 ngut, katba ka BJP ka la kiew sha ka jingdon 10 ngut ki nongmihkhmat.
