Shillong, Nailur 27
U khlieh nongïalam ka Congress bad MP barim, u Bah Vincent H. Pala ha ka Sngi Thohdieng u la ong ba ka Congress ka long kaba la pynkhreh na ka bynta ka ilekshon shiteng samoi ban wan sha ka Shillong Lok Sabha katba ki nongïaleh pyrshah ki dang ïakhun ban pynbit-pynbiang ïalade.
“Ngi la trei ha kine ki 5-6 bnai ba la dep, ngi la pynbeit pynryntih ïa ka seng ha ki shnong ki thaw bad bun ki samla shynrang bad kynthei ki la ïasoh bad ngi. Nga tharai ba ngi don hapdeng ka jinglong-jingman kaba pura kumba long mynta,” la ong u Bah Pala sha ki nongthoh khubor.
U la ong ba ka Congress ka don kham hakhmat namarba ka don ïa ka por, ka nongrim bad ki jingpynrung thymmai ha ka liang ki dkhot, khamtam hadien ka jingkylla saiñ pyrthei kaba dang shen.
“Da ki jingjia kiba dang shen, bun ki briew ki la ïasoh bad ngi, khamtam na ka UDP bad kiwei-kiwei ki seng. Lada phi peit, wat hapdeng ki nongïalam bad ki nongkyrshan jong ka UDP ruh ka don ka jingthylli bad wat hapdeng ka NPP ruh ka don ka jingkulmar-jingmut,” u la ong.
Haba kynthoh ïa ka BJP, kaba long mynta ka seng heh kaba ar ha ka liang ka jingbun paid hapoh Ïingdorbar Thawaiñ hadien ka jingpynïasoh jong 8 ngut ki MLA ka UDP, u Bah Pala u la ong ba ka seng (BJP) haduh mynta kam pat ïoh kyrtong.
“Ka BJP kam pat pynbna ïa u kyrtong jong ka. Ka NPP bad ka VPP ki la sdang shaid-shaid. Kumta ha kata ka laiñ, nga sngew ba ka Congress kan don ha ka kyrdan kaba kham biang bad kaba kham bha ha ka liang ka jingpynkhreh,” u la ong.
U Bah Pala u la ïathuh ba ka seng ka la pynlong ïa ki jingïalang jong ki nongkitkam ha Ri-lum Jaiñtia, Ri-Bhoi, West Khasi Hills bad Mawphlang bad kan sa kynthup ruh ïa ka nongbah Shillong hapoh shi taïew.
“Ngim pat sdang ïa ki jingïalang paidbah namarba ngim pat tip ïa ka tarik. Nga kyrmen ba ka ilekshon kan long hapoh shibnai ne shibnai shiteng, hynrei ngi la pynkhreh,” u la bynrap.
Halor ka seng ka ban ai ka jingïakhun kaba tyngeh, u Bah Pala u la ong ba kane kan sa paw shai tang hadien ba la pynbna ïa ki tiket.
“Ka long kaba eh ban ong mano ban long ka nongïakhun kaba kham jwat. Mynta, lada nga pynlong jingïalang, bun kin wan. Ha ka jingïalang jong ka NPP, bun kin leit, ha ka jingïalang jong ka VPP, bun kin leit. Ka jinglong-jingman jong ka rai kam pat wan, tang ka jinglong-jingman jong ka jingpynkhreh ka la don,” u la ong.
“Kumta ka rai ka shong ha ki paidbah, ngim tip mano ban jop. Ka lah ban don ka jingkylla ha ki ‘vote’ shisien ba ka BJP ka pynbna ïa u kyrtong jong ka. Kumba ka long mynta, baroh ki seng ki khlaiñ – ka NPP ka khlaiñ, ka VPP ka khlaiñ, ka UDP ka la khlaiñ da ka jingdon jong ki 12 ngut ki MLA hynrei mynta ka la don ka jingkylla, bad ka Congress ka don ïa ka nongrim kaba khlaiñ ha ki shnong ki thaw,” u la ong.
Halor ki jingdawa ba la buh da ki 8 ngut ki MLA hashuwa ban rung sha ka BJP, u Bah Pala u la ong ba kam don jingthymmai eiei haba ïadei bad kane.
“Kine kim dei ki jingdawa kiba thymmai, ki dei ki jingdawa ki barim bad kim dei kiba eh. Ka jingtih dewïong – ka seng bad ngi baroh ngi la rah ïa ka, ka BJP hi ka la kular ha ka ‘manifesto’ ba la dep jong ka. Ka Sorkar ka hap tang ban shu pynlong aiñ bad phah sha Parliament,” u la ong.
“Kiwei pat ki jingdawa kum ka jingpynrung ha ka Khyrnit ba 8 ki long kiba lah ban leh. Lada ki lah ban wanrah jingkylla ïa ka Riti-Synshar ka Ri India, balei ym lah ïa kine? Kine ki dei ki mat kiba rit bad kiba bun ki dei ki sobjek jong ka Jylla,” la bynrap biang u Bah Pala.
