Mawkyrwat, Nailur 28
Ki riew rangbah jong ka thaiñ Langrin ki la pynrem jur ïa u Bah PS Lyngdoh halor ka jingkynthoh ïa u MLA/MDC ka Ranikor Bah Pius Marwein ba u dei u nongmihkhmat u bym don jingkitkhhlieh ïa ka dong ka thaiñ bad u wan iuh kjat ha ka thaiñ Wahkaji bad Plangdiloin tang shisien ha ka san snem bad ka jingkylla kaba u wanrah kam long ha ka roi ka par hynrei ban pynbieit ïa ki paidbah na ka sanspah sha ka shihajar bad na ka shihajar sha ka arhajar tyngka.
U Bah Tailinroy Nonglang, Bah Synsharbor Nongphlang bad Bah PF Nonglang haba kren sha ki lad pathai khubor ki la ong ba u Bah PS Lyngdoh u la shu kren kulmar bad kren lamler namar um tip eiei ïa ki kam pynroi kiba u MLA/MDC u la noh sha ka dong ka thaiñ namar ïalade u sah ha Shillong bad ki la kynthoh ruh ba ka jingkynnoh jong u ka dei tang ka buit ban pynthohbria ïa u nongmihkhmat bad ki la ïathuh ruh ba tang ha ka thaiñ Wahkaji bad Phlangdiloin u MLA/MDC u la wanrah bun ki kam pynroi naduh ki jaka pule, ki dorbar hall, ki surok, madan phutbol bad ki skhim shimet ïa ki paidbah.
Ki la ong ruh ba ha kaba ïadei bad ka surok Wahkaji, Phlangdiloin Ranikor kaba ki paidbah ki la angnud da ki phew tylli ki snem, u Bah Pius hadien ba u la jop ïa ka ilekshon u la shimkhia bad buddien ïa kane ka kam na ka por sha ka por ha kaba u la phah jingthoh ruh sha ka Sorkar na ka bynta ban siangrong noh ïa ka surok Wahkaji, Phlangdiloin haduh Sdad Rilang kaba 22 km ha ka jinglut kaba T.45 klur tam.
Shuh shuh ki la ïathuh ruh ba namar ka jingwan ka jingïaseng Syllok ki Pastor ha u bnai Risaw, 2026 ha ka Balang Presbyterian Phlangdiloin, u MLA/MDC wut wut u la pyntih thymmai ïa ka surok kaba 1km tam ban pynsuk ïa ki paidbah nongleit jingïaseng bad kaba sah mynta ka long sa tang ban siang rong.
Kitei ki riew rangbah ki la pynem jur ïa u Bah PS Lyngdoh halor ka jingkynnoh bym don nongrim jong u ïa u MLA/MDC bad dawa ruh ba u dei ban wanrah ïa ki sakhi satar halor ka jingkynnoh jong u.
